Айрат Хәйруллин: “Безнең өчен һәр шикаять – бүләк”

Әлмәттә гражданнардан ел дәвамында “Халык контроле” системасы аша кергән заявкаларны гамәлгә ашыру турында киңәшмә булды. Анда Татарстанда кеше хокуклары буенча вәкаләтле Сәрия Сабурская һәм район башкарма комитеты җитәкчесе вазифаларын башкаручы Айрат Хәйруллин, район оешмалары һәм предприятиеләреннән җаваплы затлар катнашты.

Сәрия Сабурскаяның Әлмәт районы белән кызыксынуы юкка гына түгел. Әлмәтлеләр Татарстанда “Халык контроле” системасыннан иң актив файдаланалар. Программа гамәлгә куелганнан бирле алардан 1881 заявка кергән, шуларның 1354е хәл ителгән, 21е әлегә “эштә”. Быел гражданнарның активлыгы арткан. 18 мартка системада 175 мөрәҗәгать теркәлгән. Шуларның 107се инде хәл ителгән. Заявкаларның бик аз өлешенә генә нигезле отказ бирелә.

Сәрия Сабурова Әлмәттә югары нәтиҗәләргә ирешүләрен билгеләп үтте, шулай ук кайбер җитешсезлекләрне дә телгә алды. Заявкаларны хәл кылу проценты югары булса да, озак вакыт хәл кылынмый торганнары да бар. Омбудсмен объектив сәбәпләр аркасында заявкаларны үтәү срогын бер тапкыр гына күчерергә мөмкин икәнлеген җаваплы кешеләрнең исенә төшерде. Шуның өстенә проблеманы тәмам хәл иткәнчегә кадәр вакытлы чаралар күрелергә тиеш.

Район башкарма комитеты җитәкчесе вазифаларын башкаручы Айрат Хәйруллин, район хезмәтләренә мөрәҗәгать итеп, болай диде: “Безнең өчен һәр мөрәҗәгать бүләк ул. Җитешсезлекләребезне күрсәткән кешеләргә рәхмәт кенә әйтергә кирәк”. Ул шулай ук заявкаларның күп булуы системаның нәтиҗәле эшләвен, хакимият органнарына ышаныч арта баруын күрсәтә дип билгеләп үтте. Аның сүзләренә караганда, шикаятьләр һәм тәкъдимнәрнең күп өлеше территорияләрнең (бигрәк тә ишек алларының) төзеклегенә, юл хәрәкәте иминлеген тәэмин итүне оештыруга (шул исәптән светофорлар куюга) кагыла.

- Кызганыч ки, тиешле эшләрне башкару өчен акча табып булмаган чаклар да бар, әмма без планлы рәвештә куелган максатларга ирешү юлыннан барабыз. Бу эштә муниципалитетка “Татнефть” ААҖ һәм башка предприятиеләр дә ярдәм итә, - диде Айрат Ринатович.

Киңәшмә барышында Айрат Хәйруллин тагын бер мөһим мәсьәләгә – кешеләрне авария хәлендәге йортлардан күчерүгә дә тукталды.