Айрат Хәйруллин Бердәм исәпләү-теркәү үзәгенең үзәк офисында һәм филиалларында булды

Бүген район башкарма комитеты җитәкчесе вазифаларын башкаручы Айрат Хәйруллин Бердәм исәпләү-теркәү үзәгенең үзәк офисында булды. Ул хезмәткәрләрнең нинди шартларда эшләве, клиентларга ни дәрәҗәдә сыйфатлы хезмәт күрсәтүе белән танышты.

Тулаем алганда, үзәк офистагы күренеш Айрат Хәйруллинны канәгатьләндерде. 2013 ел башында абонентлар бүлеге капиталь ремонттан соң файдалануга тапшырылган иде, биредә бухгалтерлар һәм кадрлар бүлеге хезмәткәрләре өчен шартлар тудырылган.

Эш сәфәре барышында Айрат Хәйруллин Үзәкнең берничә филиалында да булды. Тельман урамындагы 2013 елда ремонтланган филиалдан башлады. Үзәкнең директоры Ольга Носова әйтүенчә, биредә соңгы вакытта хезмәт күрсәтүгә зарланучы юк, гәрчә филиал бер көнгә 50 кешегә кадәр хезмәт күрсәтә ала. Кешеләр күбесенчә гомумйорт ихтыяҗларына түләү (ОДН) күп булу уңаеннан мөрәҗәгать итәләр икән.

Үзәкнең Пушкин урамындагы 28нчы йортта урнашкан филиалы күңелле тәэсир калдырды. Кешеләрне кабул итү өчен 4 тәрәзә эшли. Биредә ремонт эшләре 2013 ел ахырында башкарылган, эшләүчеләр өчен дә, килүчеләр өчен дә шартлар яхшы. Тәрәзәләр, идән алыштырылган, яңа оргтехника алынган, беркадәр мебель яңартылган. Биредә мәгълүмат тактасын тулысынча яңартканнар, анда хәзер гамәлдә булган закон актлары, паспорт-виза хезмәте информациясе белән танышырга була. Айрат Хәйруллин башка филиалларга да мәгълүматлар җиткерүдә бу филиалдан үрнәк алырга тәкъдим итте.

Ленин урамындагы һәм Төзүчеләр проспектындагы филиаллар да ремонтланган. Әмма шулай да сораулар туды, мәсәлән, килүчеләр өчен белгечләргә мөрәҗәгать итү уңайлы түгел. Барлык филиалларда да клиентка башын иеп сөйләшергә туры килә.

“Рас бу хезмәт күрсәтү өлкәсе икән, уңай шартлар тудырырга кирәк. Клиентлар операционист белән башын иеп аягүрә түгел, урындыкка утырып сөйләшерлек булсын”, - диде Айрат Хәйруллин.
Бердәм исәпләү-теркәү үзәгенең алты филиалы һәм үзәк офисы бар. Район башкарма комитеты җитәкчесе вазифаларын башкаручы Айрат Хәйруллин әйтүенчә, бу Үзәк һәм торак-эксплуатация идарәләре тарафыннан хезмәт күрсәтүнең сыйфаты даими күзәтелеп торачак.