Әлмәттә педагогик белем бирү хезмәткәрләрен котладылар
5 октябрь - Бөтендөнья укытучылар көне, илебезнең төп бәйрәмнәренең берсе. Педагоглар хезмәте Ватаныбызның киләчәген билгели. Бу һөнәр ияләре-ялкынлы йөрәкле кешеләр, аның яктысы яшь буынга юлны яктырта, яңа үрләргә ирешүгә дөрес юнәлеш күрсәтә.
Бүген Әлмәт драма театры бинасында әлеге мөһим вакыйгага багышланган тантаналы чара узды. Педагогик белем бирү хезмәткәрләрен район башлыгы Тимур Нагуманов котлады:
"Бүген бу залда мәгариф системасының иң яхшы вәкилләрен күрү бик күңелле. Сезнең хезмәтегез бәяләп бетергесез, сез чыннан да җәмгыятьнең нигезен формалаштырасыз. Мәктәп елларында алган белем һәм күнекмәләр һәрберебез өчен сайланган һөнәрнең нигезе булып тора, киләчәктә яшәү рәвешен билгели", - дип ассызыклады ул үз чыгышында.
Тимур Нагуманов билгеләп үткәнчә, команданың бердәм эше, тармак ветераннарының үгет-нәсихәтләре һәм тәҗрибәсе, хәзерге буын педагогларының һәм яшь укытучыларның хезмәте нәтиҗәсендә район мәгариф системасында ышанычлы динамика күзәтелә. Бу олимпиадалар, һөнәри осталык конкурслары нәтиҗәләре, йөз балл җыючылар саны һәм башка бик күпләр белән раслана.
"Ел саен мәгариф учреждениеләренең матди-техник базасын яхшырту күркәм традициягә әверелде. Икътисадтагы кыенлыкларга карамастан, илебез Президенты башлап җибәргән милли проектлар, Татарстан Республикасы Рәисе һәм "Татнефть" компаниясе ярдәме белән без я яңа мәктәп төзибез, я гамәлдәгеләрен капиталь ремонтлыйбыз һәм яңартабыз", - дип өстәде район башлыгы.
"Миңа шулай ук бүген иң лаеклы педагогларны бүләкләү өчен районнан гамәлгә куйган грантларны тапшыру икеләтә күңелле. Безнең тагын бер яхшы тарих барлыкка килде-яшь белгечләргә ярдәм итү өчен акча бүлеп бирү турында Карар кабул ителде. Без бүгенге буынның көчәя баруын һәм киләчәгебезнең аларда булуын аңлыйбыз", - дип билгеләде Тимур Нагуманов.
Район башлыгы педагогик җәмәгатьчелекнең барлык вәкилләрен бәйрәм белән котлады, ныклы сәламәтлек, мөмкин кадәр күбрәк талантлы һәм чын-чынлап рәхмәтле укучыларга теләде.
Аннары бүләкләү тантанасы булды. Югары нәтиҗәләргә ирешкән педагогларга Тимур Нагуманов дәүләт һәм ведомство бүләкләрен, бүләкләү билгеләрен, Министрлыкның, Советның һәм Башкарма комитетның Мактау грамоталарын тапшырды.
133 укытучы 6 млн сумлык Әлмәт муниципаль районы башлыгы грантына лаек булды. Моннан тыш, социаль ярдәм сыйфатында быелның 1 сентябрендә һөнәри эшчәнлекләрен башлаган 40 яшь белгечкә 100әр мең сум сертификат тапшырылды.
"Без яшь белгечләрнең шәһәребезнең мәгариф системасын үстерүгә керткән өлешләрен югары бәялибез. Бүген без аларга профессиональ карьералары башланганда ярдәм итәргә һәм уңышлы эшләү өчен шартлар тудырырга телибез", - дип билгеләде Тимур Нагуманов.
Яшь педагогларга ярдәм беренче тапкыр күрсәтелә һәм җирле бюджеттан финанслана.
Мәгариф идарәсе җитәкчесе Ирина Павловская хезмәттәшләренә иң изге теләкләрен җиткерде. Ул шулай ук бүләкләү тантанасын уздырды. Бүләкләү тантанасы балалар чыгышлары һәм матур концерт номерлары белән чиратлашып барды.