Агымдагы елның 8 аенда ТРның консолидацияләнгән бюджеты кереме 139,4 млрд сум күләмендә булган

2016 нчы елда Татарстан Республикасының консолидацияләнгән бюджеты кереме 196,2 млрд сум, чыгымы 202,0 млрд сум булыр дип көтелә, дефицит 5,8 млрд сум тәшкил итәчәк. Республика бюджеты кереме 160,7 млрд сум, чыгымы 166,5 млрд сум булыр дип фаразлана, бюджет кытлыгы - 5,8 млрд сум. Әлеге мәгълүматларны бүген ТР Министрлар Кабинетында ТР финанс министры Радик Гайзатуллин җиткерде.

Татарстанның 2016 нчы елга, 2017 һәм 2018 нче еллардагы планлы чорга социаль-икътисади үсеше фаразы һәм Татарстанның 2016 нчы елга һәм 2017, 2018 нче елларның планлы чорына консолидацияләнгән бюджеты проекты буенча фикер алышуга багышланган утырышта ТР Президенты вазифаларын вакытлыча башкаручы Рөстәм Миңнеханов, ТР Дәүләт Советы Рәисе Фәрит Мөхәммәтшин, министрлыклар һәм ведомстволар башлыклары, федераль структураларның территориаль органнары җитәкчеләре һәм башкалар катнашты.

Икенче мәсьәлә буенча төп доклад белән чыгыш ясаган финанс министры Радик Гайзатуллин билгеләп узганча, быел ТР бюджеты үтәлеше планлаштырылган күрсәткечләр кысаларында уза, бюджетның барлык дәрәҗәләренә керем тизлеге тәэмин ителә, республиканың төп финанс законы тарафыннан каралган финанслау вакытында һәм тулы күләмдә гамәлгә ашырыла. “Бюджетка килгән керем бюджет өлкәсе хезмәткәрләренә эш хакын вакытында түләргә, бюджет оешмаларының коммуналь хезмәтләрен капларга, башка социаль әһәмияткә ия чыгымнарны финансларга мөмкинлек бирде”, - дип белдерде министр. Шулай да, аның әйтүенчә, республика бюджеты үтәлешендә уңай вәзгыять булуга карамастан, ел азагына кадәр планлаштырылган керемнәрнең тулысынча килүендә катлаулыклар килеп чыгуы ихтимал. 2015 нче елда табышка салым буенча кайбер эре предприятиеләр исәпләүләре шул хакта сөйли.

Радик Гайзатуллин хәбәр иткәнчә, 2015 нче елның 8 ае эчендә, Татарстанның консолидацияләнгән бюджетына салым һәм салымнан тыш, 139,4 млрд сум күләмендә керем алынган. ТРның консолидацияләнгән бюджетына быел физик затлар кеременә 57,4 млрд сум күләмендә салым керер дип фаразлана, 2016 нчы елга фараз – 59,3 млрд сум. Консолидацияләнгән бюджетка быел оешмалар мөлкәтенә салынган 19,6 млрд сум күләмендә салым килеп ирешер дип көтелә, киләсе елда аның 19,7 млрд сум булуы фаразлана.

Министр сүзләренә караганда, фараз буенча, консолидацияләнгән бюджетның социаль мөһим чыгымнары киләсе елда 74,7 млрд сум тәшкил итәчәк. Әйтик, 2016 нчы елда мәгариф өлкәсендә чыгымнарның 63,4 млрд сум булачагы планлаштырыла. “Мәдәният һәм кинематография” бүлеге чыгымнары консолидацияләнгән бюджетта 6,4 млрд сум, ТР бюджетында 2,8 млрд сум булачак. “Сәламәтлек саклау” бүлеге чыгымнарының гомуми күләме 24,3 млрд сум тәшкил итәчәк. “Социаль сәясәт” бүлеге чыгымнары ТРның консолидацияләнгән бюджетында 17,6 млрд сум, ТР бюджетында 17,0 млрд сум күләмендә фаразлана.

Рөстәм Миңнеханов утырыш азагында республика бюджетын формалаштыру буенча күләмле эш башкарылуы турында хәбәр итте. Ул, шулай ук, катлаулы икътисади хәлгә карамастан, киләсе елда барлык гамәлдәге программалар дәвам иттереләчәген ассызыклады. Татарстан лидеры 17 нче октябрьдә Татарстан Дәүләт Советы утырышында ТР консолидацияләнгән бюджеты һәм ТР бюджеты проектын беренче укылышта карарга тәкъдим итте.