ТРда кәрәзле элемтәдән 100 процент файдалану өчен аның тагын 63 торак пунктка үтеп керүе кирәк

Соңгы 5 елда Татарстанда кәрәзле элемтә абонентлары 900 гә диярлек арткан. Шуны да билгеләп үтәргә кирәк: соңгы 2 елда абонентлар саны кискен үсү сизелмәгән. Актив SIM–карталар ярдәмендә кәрәзле элемтәнең үтеп кереше 172 процент тәшкил итә. 2010 ел белән чагыштырганда, бу сан 22 процентка арткан.

Бу хакта бүген IT-паркта ТР Мәгълүматлаштыру һәм элемтә министрлыгының 2015 елның яртыеллыгы буенча нәтиҗәләргә багышланган коллегия утырышында министрның беренче урынбасары Юрий Багров хәбәр итте.

ТР Премьер-министры урынбасары-ТР мәгълүматлаштыру һәм элемтә министры Роман Шәйхетдинов рәислегендә IT-паркта үткәрелгән коллегия утырышында хисап тоткан Юрий Багров сүзләренчә, Татарстанда хәзерге вакытта кәрәзле элемтәнең 9 меңләп үзәге эксплуатацияләнгән, шуларның 500е быел гыйнвар-июнь айларында. Республиканың 99,98 процент торак пункты кәрәзле элемтәдән файдалана ала. Бу санны 100 процентка җиткерү өчен Татарстанның тагын 63 торак пунктын шундый элемтәбелән тәэмин итү кирәк, аларда 1дән алып 793кә кадәр кеше яши.

Кәрәзле элемтәдән файдаланучылар номерларын югалтмыйча гына операторларны алмаштыру мөмкинлегенә ия булды. Әлеге хезмәттән республикада 55 мең кеше файдалануга гариза тапшырган, 41 мең кеше операторларын алмаштырган. Россия буенча бу күрсәткеч 2,2 миллионны тәшкил итә. Әлеге гаризаларның 1,6 миллионы чишелеш тапканлыгы хакында хәбәр итте министрның беренче урынбасары.