Алсу җилкәннәр символлы чыгарылыш кичәсе

11 сыйныф укучыларының чыгарылыш имтиханнары тәмамланды. Бик тиздән алар кулларына аттестат алып олы тормышка юл тотачак. 26 июнь көнне 10 нчы мәктәптә узган чыгарылыш кичәсендә булачак инженерлар, төзүчеләр, укытучыларны ӘМР башлыгы урынбасары Наҗия Хәйдәрова тәбрикләде.

-ӘМР башкарма комитеты җитәкчесе Айрат Хәйруллин һәм шәхсән үз исемемнән сезне бу зур һәм шатлыклы вакыйга белән тәбрик итәм. Еллар узгач мәктәп елларын көлеп һәм сагынып искә алачаксыз, чөнки әлеге вакытлар иң күңелле чаклар. Сез белем алган 10 нчы мәктәп шәһәребезнең иң алдынгы мәгариф учреждениеләренә керә. Биредә хезмәт куючы укытучыларга чиксез олы рәхмәтләребезне җиткерәбез. Татарстанда республикабызның лидеры Рөстәм Миннеханов тарафыннан сәләтле яшьләрне тәрбияләү буенча искиткеч күләмле эшләр башкарыла. Мин сезнең тормышта үз урыныгызны табып, чын шәхесләр булып иршүегезне теләп калам, - дип теләкләрен җиткерде Наҗия Мисбаховна.

Чыгарылыш бәйрәмендә укытучылар, мәктәп директоры һәм әти- әниләр адресына да күп рәхмәт сүзләре әйтелде. Кулларына урта белем алу турындагы аттестат алган егетләр һәм кызлар туган мәктәпләрен онытмаска вәгъдә бирделәр.