Бөтенроссия робот техникасы олимпиадасында җиңгәннәр вузга имтиханнарсыз керергә хокуклы булырга мөмкин

Бөтенроссия робот техникасы олимпиадасына юридик әһәмият бирү күздә тотыла. Анда җиңү яулаган 11нче сыйныф укучылары киләчәктә илнең югары уку йортларына имтиханнарсыз керү хокукына ия булырга мөмкин.

Бу хакта бүген ТР Хөкүмәте йортында уздырылган брифингта ТР Премьер-министры урынбасары – ТР мәгълүматлаштыру һәм элемтә министры Роман Шәйхетдинов белдерде. Аның сүзләренә караганда, әлеге инициативаны ТР Президенты вазифаларын вакытлыча башкаручы Рөстәм Миңнеханов та хуплаган. Хәзерге вакытта бу мәсьәлә РФ Мәгариф һәм фән министрлыгы тарафыннан карала, дип сөйләде министр.

Моннан тыш, ул РФ мәгариф һәм фән министры Дмитрий Ливанов һәм РФ элемтә һәм массакүләм коммуникацияләр министры Николай Никифоровны бөтенроссия робот техникасы олимпиадасының оештыру комитеты рәистәшләре итү тәкъдиме турында да әйтте.

Роман Шәйхетдинов билгеләп узганча, киләчәктә олимпиада халыкара дәрәҗәдә үткәрелергә мөмкин. Әйтик, 2015-2016 елларда анда катнашуга Евразия икътисади бергәлеге илләре, аерым алганда, Беларусь, Казакъстан, Үзбәкстан, Таҗикстан, Кыргызстан командаларын чакыру ниятләнә. Шулай ук олимпиада хәрәкәтенә БРИКС (Бразилия, Россия, Һиндстан, Кытай, Көньяк Африка Республикасы) илләрен кушу мөмкинлеге дә карала, дип сөйләде министр.

Ул Татарстанның халыкара робот техникасы олимпиадасын уздыруга гариза бирергә теләвенә игътибар юнәлтеп: “Безнең планда – 2018 елда Татарстанда робот техникасы буенча дөнья олимпиадасын уздыруга гариза бирү”, – диде.