Татарстанда тәмәкегә каршы закон үтәлеше айлыгы башланды

Россиядә ир-атларның 65, хатын-кызларның 30 проценттан артыгы тәмәке тарта.

Татарстанда тәмәкегә каршы закон үтәлеше айлыгы старт алды. Ул ТР Сәламәтлек саклау министрлыгы башлангычы белән, 31 майда үткәрелә торган Бөтендөнья тәмәкегә каршы көрәш көне һәм агымдагы елда Россиядә игълан ителгән Йөрәк-кан тамыры авыруларына каршы көрәш елы уңаеннан, оештырыла. ТР Хөкүмәте карары нигезендә чаралар планы расланган. Аны Татарстанның берничә министрлыгы һәм ведомствосы тормышка ашырачак. 19 июньгә кадәр республикада сәламәт яшәү рәвешен пропагандалауга, тәмәкегә каршы законны үтәү өлкәсендә халыкның мотивациясен күтәрүгә юнәлтелгән чаралар, аерым алганда, медицина учреждениеләрендә ачык ишекләр көне, лекцияләр, әңгәмәләр, белем бирү йортларында төрле акцияләр үткәрү күздә тотыла.

Бу хакта бүген “Татар-информ” мәгълүмат агентлыгында уздырылган матбугат конференциясендә ТР Сәламәтлек саклау министрлыгының профилактик ярдәм бүлеге башлыгы Елена Хафизова бәян итте.

Ул китергән мәгълүматларга караганда, бүген Россиядә ир-атларның 65, хатын-кызларның 30 проценттан артыгы тәмәке тарта. Югары уку йортларында белем алучылар арасында бу сан тагын да зуррак – егетләрнең 75, кызларның 64 проценты – әлеге яман гадәт корбаннары. Кагыйдә буларак, тәмәке тарта башлау яшүсмерлек елларына туры килә. Бу чорда ир-атларның 80 проценты, хатын-кызларның 50 проценты тәмәке пыскыта башлый.

Елена Хафизова искәртеп узганча, Россиядә 2013 елның 1 июненнән үз көченә кергән “Гражданнар сәламәтлеген тирә-юньдәге тәмәке төтене тәэсиреннән һәм тәмәке тартуның куркыныч нәтиҗәләреннән саклау турында”гы Федераль закон җәмәгать урыннарында, мәгариф, мәдәният, сәламәтлек саклау, социаль яклау, физик тәрбия һәм спорт учреждениеләре объектларында, тернәкләндерү оешмалары һәм санаторийларда, һава, коры җир, елга вокзалларында, бинага керү урыннарыннан 15 метрдан да якынрак араларда тәмәке тартуны тыя. Шулай ук андый төр продукция сату, рекламалау өлкәсендә дә аерым бер чикләүләр кертелде.

Россия Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең ТР буенча идарәсенең азык-төлек гигиенасы күзәтчелеге бүлеге башлыгы урынбасары Ольга Фомичева хәбәр иткәнчә, былтыр тәмәке сату буенча 500дән артык объект тикшерелгән. Аларның яртысында закон бозу очраклары теркәлгән. Нәтиҗәдә, 256 зат административ җаваплылыкка тартылган. Аларга салынган штраф күләме 2 млн сум тәшкил иткән. Агымдагы елның 1нче кварталында тикшерелгән 120 объектның дүттән берендә закон бозу очраклары ачыкланган.

ТР буенча Эчке эшләр министрлыгының административ законнарның үтәлешен оештыру бүлеге башлыгы вазифаларын башкаручы Алмаз Нәфыйков сүзләренчә, былтыр хокук сакчылары ТРда тәмәкегә каршы законны бозуның 11 меңнән артык очрагын теркәгән. Агымдагы елның 22 маена рөхсәт ителмәгән урыннарда тәмәке тарткан өчен 6,7 меңнән артык административ протокол төзелгән.

ТР мәгариф һәм фән министры урынбасары Лариса Сулима сүзләренчә, хәзерге вакытта республиканың барлык белем бирү йортларында тәмәкегә каршы актив профилактик эшчәнлек алып барыла. Бигрәк тә ата-аналар белән эшләүгә аерым игътибар бирелә, чөнки бүген алар арасында да тартучылар күп. Мәктәптә нинди генә тәрбияви чаралар күрелмәсен, әгәр бала кечкенәдән әти-әнисенең тәмәке тартуын күреп үсә икән, иртәме-соңмы, ул аларның үрнәген кабатлаячак, дип саный ул. Лариса Сулима билгеләп узганча, тәмәкегә каршы закон үтәлеше айлыгы кысаларында республиканың барлык белем бирү йортларында укытучылар балаларга тәмәке тартуның зыяны турында сөйләчәк, шулай ук “Россия тәмәкесез”, “Сәламәтлек сәгате” һәм “Сәламәтлек дәресе” кебек акцияләр уздыру планлаштырыла. Әлеге чаралар җәйге каникуллар чорында эшләячәк балалар лагерьларының тәрбияви программасына да кертелде, диде ТР мәгариф һәм фән министры урынбасары.

“Татар-информ”