Алексей Песошин: “Соңгы нәтиҗә суга батып үлүчеләрнең саны кимү булырга тиеш”

Ел саен Татарстан сулыкларында 60тан 150гә кадәр кеше батып үлә. Былтыр җәен генә дә суда 68 кешенең гомере өзелгән, алардан 9ы – балалар. Әлеге фаҗигаләрнең барысы да җиһазландырылмаган ял итү урыннарында килеп чыккан. Бүген республикада мондый 179 урын бар һәм нибары 37 пляж тиешле таләпләргә җавап бирә.

Бүген ТР Министрлар Кабинетында уздырылган ТРда гадәттән тыш хәлләрне кисәтү, бетерү һәм янгын куркынычсызлыгын тәэмин итү буенча республика комиссиясе утырышында ТРның аз сыйдырышлы суднолар буенча баш дәүләт инспекторы урынбасары Регина Гаязова шул хакта хәбәр итте. Утырышны ТР Премьер-министрының беренче урынбасары, комиссия рәисе Алексей Песошин үткәрде. Анда ТР гражданнар оборонасы эшләре һәм гадәттән тыш хәлләр министры Рафис Хәбибуллин катнашты.

Регина Гаязова китергән мәгълүматларга караганда, республиканың кайбер муниципаль районнарында пляжларга аеруча зур кытлык күзәтелә. Мисалга, Минзәлә районындагы 23 ял итү урынының 1се генә пляж, Тукай районындагы 20 ял урынының нибары 2се генә җиһазландырылган. Әгерҗе, Зәй, Менделеевск, Актаныш районнарында исә тиешле таләпләргә туры килә торган пляжлар бөтенләй юк.

Шул рәвешле, бүген ТРның Минзәлә, Тукай, Әгерҗе, шулай ук Лаеш районнарында мобиль коткару бүлекчәләре булдыру зарур, дип билгеләп узды чыгыш ясаучы. Шул ук вакытта ул уңай мисалларга игътибар юнәлтеп, бәхеткә, былтыр Әтнә, Кайбыч, Алексеевск, Яңа Чишмә, Апас районнарында суга батып үлүчеләрнең булмавы турында әйтте.

Агымдагы елның маенда исә Югары Ослан, Нурлат, Сарман һәм Әгерҗе районнарында суга бату белән бәйле 1әр очрак теркәлгән. Нәтиҗәдә, 5 кеше үлгән. Фаҗигагә китергән төп сәбәп – җиһазландырылмаган урыннарда су керү, шулай ук исерек килеш балык тоту.

Регина Гаязова сүзләренә караганда, республикада көн саен кешеләр күпләп ял итә һәм су коена торган урыннар тикшерелә. Тикшерү нәтиҗәләре буенча җитешсезлекләр ачыкланып, муниципаль берәмлекләргә тиешле чаралар күрүне сорап хатлар җибәрелә.

ТРның аз сыйдырышлы суднолар буенча баш дәүләт инспекторы урынбасары хәбәр иткәнчә, күпләп ял итү урыннарында, пляжларда спорт осталары, Бөтенроссия суда коткару җәмгыяте вәкилләре, волонтерлар катнашында “Йөзәргә өйрән” акциясе уздырылачак. Аны үткәргәндә, балалар аудиториясенә аерым игътибар бирү күздә тотыла. Чыгыш ясаучы җәйге каникуллар чорында суга якын урында урнашкан балалар лагерьларында куркынычсызлык тәэмин итүнең мөһимлеген ассызыклап, ТРда мондый 64 лагерь булуы, шуның 11ендә су керү оештырылуы турында әйтте.

Утырышта пляжларның санитар торышы һәм сулыкларның коенуга яраклыгы турында Россия Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең ТР буенча идарәсе башлыгы урынбасары Алмаз Имамов бәян итте. Аның сүзләренчә, быел республикада кешеләр күпләп ял итә торган 16 урын, аерым алганда, Казандагы 5, Түбән Камадагы 6, Яшел Үзәндәге, Әлмәттәге, Алабугадагы, Яр Чаллыдагы һәм Мамадыштагы 1шәр пляж эшләр дип көтелә.

Пляж хуҗалары коену сезоны башланганчы да, сезон вакытында да суның лаборатор контролен тормышка ашырырга бурычлы. Бу төр ял урыннары функциональ өлешләргә – ял, спорт, балалар зоналарына бүленергә, медицина пунктлары, эчә торган су, бәдрәфләр, чүп контейнерлары белән тәэмин ителергә тиеш. Биредәге су объектлары кешеләр сәламәтлегенә куркыныч тудырса, суга керүне чикләү яки бөтенләй туктатуга юнәлтелгән чаралар күрелергә, шул исәптән су коену ярамау турындагы кисәтү аншлаглары урнаштырылырга, тиеш.

Алмаз Имамов искәртеп узганча, рөхсәт ителмәгән урыннарда су керү куркыныч, чөнки су аша йогышлы, шул исәптән дизентерия, сальмонеллез, полиомиелит, гепатит А, холера, корсак тифы һ.б. авырулар йогу куркынычы бар.

Алексей Песошин, үз чиратында, гражданнарның суда куркынычсызлыгы өчен төп җаваплылылык муниципаль хакимият җилкәсендә булуын искәртте. Аның сүзләренчә, муниципалитетларның бурычларына кешеләрнең күпләп ял итүенә шартлар тудыру һәм ял урыннарын тиешле таләпләргә туры китереп оештыру керә. Боларның барысы да 131нче федераль законда язылган, дип билгеләп үтте ТР Премьер-министрының беренче урынбасары. Моннан тыш, ТР Хөкүмәте ел саен күпләп ял итү урыннарында, су объектларында халыкның куркынычсызлыгын тәэмин итү буенча өстәмә чаралар күрү турындагы карар кабул итә. Ул кешеләрнең ялын оештыруга өстәмә чаралар системасын чагылдыра. Боларның барысы да җитешсезлекләрне ачыклап, аларны вакытында бетерүгә юнәлтелә, дип өстәде ул.

“Ничек кенә булмасын, һәрвакыт соңгы нәтиҗә була. Бу очракта исә соңгы нәтиҗә суга батып үлүчеләрнең саны кимү булырга тиеш”, – диде Алексей Песошин.

Ул былтыр кешеләрнең суга батып үлү очраклары теркәлгән Казан, Зәй, Минзәлә, Чистай Башкарма комитетларына мөрәҗәгать итеп, киләчәктә, бу төр фаҗигаләрне булдырмас өчен, халык иминлеген тәэмин итүгә бәйле РФ һәм РТ законнарын төгәл үтәүне таләп итте.