Айрат Хәйруллин “Әлмәтнефть” нефть-газ чыгару идарәсе ветераннарына Бөек Җиңүнең 70 еллыгына багышлап чыгарылган юбилей медальләрен тапшырды

9 май -Бөек Җиңү көнен илебез зурлап билгеләп үтәчәк. Әлеге чара кысаларында районда һәм шәһәрдә күп төрле очрашулар, бәйрәмнәр, тантаналар уздырыла. 15 апрель көнне район башкарма комитеты җитәкчесе Айрат Хәйруллин “Юность” ял һәм сәламәтләндерү лагеренда булып, “Әлмәтнефть” нефть-газ чыгару идарәсе ветераннарына Бөек Җиңүнең 70 еллыгына багышлап чыгарылган юбилей медальләрен тапшырды.

– Сезнең батырлыгыгыз алдында рәхмәт сүзләре белән башыбызны иябез, – диде ул үзенең тәбрикләү сүзендә.- Сез безгә тынычлык, зәңгәр күк йөзе бүләк иттегез. Районда 4 меңнән артык сугыш ветераны яши. Кызганыч, безгә якты тормыш бүләк итүчеләрнең сафы елдан-ел кими бара. Без аларның берсен дә онытырга тиеш түгел. Игътибар 9 Майда гына түгел, һәркөнне булсын иде. Барчагызны да якынлашып килүче Җиңү бәйрәме белән!

Әлмәт районы комиссары, полковник Ришат Сабиров та әлеге изге теләкләргә кушылды. Ул күпне күргән, утны-суны кичкән ветераннарның яшьләргә үрнәк булуларын, үсеп килүче буынга хәрби-патриотик тәрбия бирү юнәлешендә әле дә актив эшләүләрен ассызыклады.

Сугыштан соңгы елларда күп ир-егетләрнең язмышы нефть тармагы белән бәйләнгән. “Әлмәтнефть” идарәсендәге 1640 пенсионерның 17 се сугышта катнашучы, 145 е тыл батыры, 36 сы толлар. Идарә начальнигы Миргазиян Таҗиев чыгышыннан аңлашылганча, алар ялгызлары түгел, предприятиеләре өлкәннәрен онытмый. Быел гына да өлкәннәр катнашында күп чара оештырылган, ветераннарның барлык үтенечләре канәгатьләндерелгән, ветераннарның фатирларына ремонт ясалган, һәммәсе торак белән тәэмин ителгән. Болардан тыш идарә районда һәм шәһәрдәге 10 һәйкәлне төзекләндергән.

“Әлмәтнефть” идарәсенең ветераннар оешмасы рәисе Анатолий Бочкарев белдергәнчә, “Татнефть” ААҖ генераль директоры Наил Маганов карары белән сугышта катнашкан нефтьчеләргә 50 шәр мең, толларга 20 мең, тыл хезмәтчәннәренә 5 әр мең сум күләмендә акчалата премияләр бүленгән. Моннан тыш әлмәтнефтьлеләргә азык-төлек тутырылган каплар да өләшенгән.

Юбилей медале тапшыру тантанасына 60 ветеран килгән иде. Авырлык белән йөрүче һәм урында ятучы өлкәннәргә ул өйләренә барып тапшырылган. Ә унлап кешегә хөкүмәт бүләге шәһәркүләм чарада бирелде.

Ф.Хәсәнова тәрҗемәсе