Айрат Хәйруллин Бөек Ватан сугышы ветеранына юбилей медале тапшырды

ӘМР Башкарма комитеты җитәкчесе Айрат Хәйруллин бүген Бөек Ватан сугышы ветераны Нәбиулла Мөхәммәдиевның өендә булды. Россия Президенты Владимир Путин һәм шәхсән үз исеменнән тәбрикләп “1941-1945 елгы Бөек Ватан сугышында Җиңүгә 70 ел” юбилей медален, сувенир продукциясе һәм чәчәк букеты тапшырды.

Чәй табыны артына Нәбиулла Мөхәммәдиев Айрат Хәйруллин һәм ӘМР башлыгы вазифаларын башкаручы Наҗия Хәйдәрова белән сугыш елларының авырлыгы, халкыбыз күрсәткән батырлыклар турында сөйләшеп утырдылар.

Нәбиулла Мөхәммәдиев 20 яшендә сугышка алына һәм бары тик 1946 елда гына туган якларына кайты. Бәрелешләр вакытында ике тапкыр яралана, госпитальдә ята. “ Снарядның вак кыйпылчыклары әле дә тәнемдә йөри”,-ди ул.

Олы яшьтә булуына карамастан, Нәбиулла Мөхәммәдиев әле дә илдә барган һәр вакыйга белән кызыксына, тулы тормыш белән яши.

2015 елның 10 апреленә алынган мәгълүматларга караганда, “1941-1945 елгы Бөек Ватан сугышында Җиңүгә 70 ел” юбилей медальләре Әлмәт районында яшәүче 3682 ветеранга тапшырылган.

Ф.Хәсәнова тәрҗемәсе