Айрат Хәйруллин:” Шәһәрне чистарту буенча эшне бүгеннән башларга кирәк”

Әлмәт муниципаль районы башкарма комитеты җитәкчесе Айрат Хәйруллин 1 апрельдә старт алган экологик икеайлык кысаларында шәһәрдәге эш барышы белән танышты.

Башкарма комитет җитәкчесе шәхсән үзе нефтьчеләр башкаласының аеруча проблемалы урыннарын йөреп чыкты һәм территорияне чистарту, төзекләндерү буенча таләпләрнең җитди булына басым ясады.

Шевченко урамындагы берничә ишек алдында булганнан соң, Айрат Хәйруллин идарәче компанияләрнең 25 апрельне көтеп тормыйча, экологик-санитар эшчәнлекне һәр көн саен һәм даими рәвештә алып барырга тиешлекләрен ассызыклады.

Күп катлы йортларда яшәүчеләрнең көнкүреш калдыкларын билгеле бер вакытта гына чыгара алмаулары да чүп җыелу урыннарында чүп таулары барлыкка килүгә сәбәп булып тора. Әлеге проблема белән узган ел элек көрәш башланган иде инде. Заманча эшләнгән махсус контейнерлар Әлмәтнең үзәк өлешендә, 2,3 һәм 4 В микрорайоннарында урнаштырылган.

Айрат Хәйруллин шулай ук хәзерге вакытта контейнер урнаштыру өчен төзекләндерү эшләре алып барылган Шевченко урамындагы 96 нчы йортта яшәүчеләр белән аралашты. Халык башланган инициативаны бик хуплады.

Төзүчеләр урамындагы 22 нче йорт ишек алды чисталыгы һәм иркен булуы белән игътибарны үзенә җәлеп итте. Биредә яшел зона булдырырга һәм балалар мәйданчыгы төзергә тулы мөмкинлек бар , диде башкарма комитет җитәкчесе.

Белгечләр әйтүенчә, яз көне, көз һәм кыш айларында җыелган чүпне юк итү көнүзәк мәсьәлә булып тора. Тиешсез урынга җыелган чүп- чар базларының берсе Кәләй авылы җирлегендә урнашкан. Аны бетерү буенча ел да эш алып барылса да, әлегә нәтиҗәсе күренми.

ӘМР башкарма комитеты җитәкчесе Айрат Хәйруллин май бәйрәмнәренә кадәр бөтен территорияләрдә дә чистарту һәм төзекләндерү эшләре тәмамланырга тиешлеген ассызыклады.

Ф.Хәсәнова тәрҗемәсе