Айрат Хәйруллин: “ Мин Әлмәткә озакка һәм җитди максатлар белән килдем!”

Бүген башкарма комитетта Әлмәт районы Советының XLII сессиясе һәм шәһәр Советының XLI сессиясе булып узды. Көн тәртибе буенча 6 мәсьәлә каралды.

Әлмәт муниципаль районы башкарма комитеты җитәкчесен сайлау сессиягә чыгарылган төп сорауларның берсе булды. Башкарма комитет җитәкчесе вазифасына бәйге нәтиҗәләре буенча ике кандидатура сайланган иде. Аның берсе башкарма комитет җитәкчесе вазифаларын башкаручы Айрат Хәйруллин һәм шәһәр Советы депутаты, ӘДМХИ ректоры Ильяс Салахов иде.

Үзенең чыгышында билгеләп узганча, Айрат Хәйруллин башкарма комитет җитәкчесе вазифаларын башкарырга бер ай элек керешкән, икътисади үсеш, мәгариф, сәламәтлек саклау , торак коммуналь хуҗалык, авыл хуҗалыгы, урта һәм кече бизнес, иҗтимагый транспорт үсешен үстерүгә юнәлдерелгән төп программалар турында сөйләде.

“Бергәләп без әлмәтлеләргә уңайлы яшәү шартлары булдыру, тормыш дәрәҗәсен яхшырту юнәлешендә эшләргә тиешбез. Кешеләрнең бу юнәлештәге уңай үзгәрешләрне иртәгә түгел, ә нәкъ менә бүген сизүләре мөһим. Әлмәт районы барлык юнәлешләр буенча да алдынгы булырга тиеш” – диде ул үзенең чыгышында.

Айрат Хәйруллин кандидатурасын шәһәр Советы депутаты Рамил Гарифуллин, район Советы депутаты Ришат Фазлыев яклап чыкты. Айрат Ринатовичның эшчәнлегенә ТР Президентының вәкаләтле вәкиле Тимур Нагуманов та югары бәя бирде.

“Айрат Хәйруллин район һәм шәһәрдәге проблемаларны бик ачык күрә, аларны чишү юлларына грамоталы рәвештә якын килә. Алдагы эшчәнлегендә аңа уңышлар телим,” – диде Дәүләт Думасы депутаты Ришат Әбүбакиров.

Айрат Хәйруллин бертавыштан Әлмәт муниципаль районы башкарма комитеты җитәкчесе итеп сайланды.

Сессия барышында Әлмәт прокуроры Рафаэль Шакиров, Татарстан Республикасында кеше хокукларын саклау буенча вәкаләтле вәкиленең Әлмәт районы буенча ярдәмчесе Фәргат Сафин да чыгыш ясады. Сессия тантаналы бүләкләү белән тәмамланды.

Ф.Хәсәнова тәрҗемәсе