Әлмәттә яңа йортка урнашу тантанасы булды

Бүген “Көнбатыш капка” микрорайонында 9 катлы яңа йортны тантаналы ачу булды. 156 квартирлы заманча йортта уңайлыклы 95 квартирның хуҗалары инде билгеле. Бүген яңа квартирларга Бөек Ватан сугышы ветераннары, ятим һәм караучысыз калган балалар, шулай ук бюджет сферасында эшләүчеләр күчеп килде. Торак алучылар арасында Татарстанның башка районнарыннан килүчеләр дә бар. 61 квартир авария хәлендәге йортларда яшәүчеләргә тәкъдим ителә.

Яңа торакка күчүчеләрне истәлекле вакыйга белән район башкарма комитеты җитәкчесе вазифаларын башкаручы Айрат Хәйруллин тәбрик итте. Аларның шатлыгын ТР Дәүләт Советы рәисе Фәрит Мөхәммәтшин да бүлеште.

Гафиятуллин урамындагы 66нчы йортның заказчысы – ТР президенты каршындагы Дәүләт торак фонды, генераль подрядчик – “Стройкомплекс” ҖЧҖ. Йорт иң яңа технологияләр кулланып төзелгән, квартирларда җылылыкны аерым исәпкә алу приборлары куелган. Мөмкинлекләре чикләнгән кешеләр өчен лифт-пандуслар каралган.

Яңа квартир хуҗаларына ачкычларны Фәрит Мөхәммәтшин белән Айрат Хәйруллин тапшырды. Игътибар үзәгендә Бөек Ватан сугышы ветераннары булды. Алар исеменнән Әхмәтова Мөннәвирә Сәйфулла кызы республика, шәһәр, район җитәкчеләренә шулай кайгыртулары өчен рәхмәт сүзләре әйтте.

”Алсу” идарәче компаниясе” ҖЧҖ директорына йортның ачкычын тапшырганнан соң шәрәфле кунаклар Бөек Ватан сугышы ветеранының толы Зәрига Шәйдуллина квартирына керделәр. 101 яшьлек Зәрига әби аларны чәй әзерләп каршы алды. Район башкарма комитеты җитәкчесе вазифаларын башкаручы Айрат Хәйруллин аңа “1941-1945 еллардагы Бөек Ватан сугышында җиңүнең 70 еллыгы” медален тапшырды. Ветеранның гаиләсе өчен бу зур вакыйга. “Әниебезгә сентябрьдә 102 яшь тула, - диде аның кече кызы Әлфия Гыйбадуллина. – Без әниебезнең бу көнне бөтен уңайлыклары булган яңа квартирда каршылавына бик шат”.

Кунакларны Каюмовлар гаиләсендә дә шатланып каршы алдылар. Яңа квартирга күчү – яшь гаиләнең чынга ашкан хыялы.

“Яңа ел төнендә юраган теләгебез тормышка ашты. Без бик бәхетле. Мин квартирны ятим балаларга булышлык программасы буенча алдым, - диде Регина Каюмова. – Квартир бик әйбәт, зур, якты. Микрорайон да яхшы: балалар бакчасы, мәктәп, кибет – бөтенесе дә янәшә генә”.