Илдар Халиков: “ТР икътисады үсешендә тискәре тенденцияләр чагыла башлады”

ТР Дәүләт Советының чираттагы утырышында ТР Премьер-министры Илдар Халиков ТР хакимияте органнарының 2014 елгы эшчәнлеге турында хисап тотты.

2015 елның гыйнвар аенда Татарстанда тулаем төбәк продукты 0,1 процентка кимегән. Сәнәгать җитештерү индексы исә, гыйнвар-февраль айларында 99,3 процентны тәшкил иткән, авыл хуҗалыгы продукциясен җитештерү 1,4 процентка арткан, ваклап сату әйләнеше 15 процентка кимегән.

“ТР икътисады үсешендә тискәре тенденцияләр чагыла башлады”, - диде ул. Икътисад үсеше темплары кимүгә сәнәгать җитештерүе һәм куллану базары үсешенең кимүе йогынты ясаган. 2014 ел йомгаклары буенча тулаем төбәк продукт үсеше 101,3 процентны тәшкил иткән. 2013 елда бу күрсәткеч 102,4 процент булган. Сәнәгать җитештерү индексы исә 100,6 процент, бушатылган продукция күләме 1 трлн 641,5 млрд сумны тәшкил иткән.

Нефть продукциясен һәм нефть химиясен җитештерүнең чагыштырма күрсәткеченең шактый үсеше сәнәгатьнең алга таба да үзгәрештә булуын дәлилли, 2014 елда ул 37,1 процент тәшкил иткән (2013 елда — 34,7 процент). Премьер-министр республикада күптән түгел генә ачылган нефть химиясен җитештерү буенча шөгыльләнүче объектлар исемлегенә дә тукталды һәм аларның шактые чит илдән кертелүче товарларны үзебездә җитештерелгәннәр белән алмаштыру буенча кирәклеген искәртте.

Илдар Халиков хисабы вакытында Татарстанның төбәк продукт буенча Россия Федерациясендә 7 нче урында, авыл хуҗалыгы продукциясен җитештерү буенча 3 нче урында, сәнәгать продукциясен җитештерү һәм инвестицияләр капиталы буенча 5 нче урында, төзелеш буенча — 6 нчы урында, торакны ваклап сатуга кертү буенча 8 нче урында тору хакында хәбәр итте.