Айрат Хәйруллин: “Бизнеска яшь, талантлы, инициативалы кешеләрне тартып, без офыкларны киңәйтә алачакбыз”

Бүген ӘМР территориясендә экономиканың тайпылышсыз үсешен һәм социаль тотрыклылыкны тәэмин итү комиссиясенең утырышы булды. Аны район башкарма комитеты җитәкчесе вазифаларын башкаручы Айрат Хәйруллин үткәрде.

Хезмәт базарындагы хәлне Мәшгульлек үзәге директоры Минсәгыйт Насертдинов бәян итте. Ул ел башыннан бирле Мәшгульлек үзәгенә ярдәм сорап 923 кеше килүен әйтте. Исәптә барлыгы 1220 эшсез граждан тора. Кризиска каршы план кысаларында барлык предприятиеләрнең җитәкчеләре штатларны кыскарту көтелүе турында мәшгульлек үзәгенә хәбәр итәргә тиешләр. Хезмәт базарындагы киеренкелекне йомшарту өчен төрле төрдәге субсидияләр каралган.

Район башкарма комитеты җитәкчесе вазифаларын башкаручы Айрат Хәйруллин эшне системага салырга һәм гамәлдәге дәүләти программалар турында барлык эш бирүчеләргә җиткерергә тәкъдим итте.

Кризиска каршы чаралар һәм вак һәм урта бизнес өчен дәүләти программалар белән залдагыларны ӘМР эшкуарлыкны үстерү департаменты директоры Александр Глазков таныштырды.

Бүген Әлмәт районында 6,5 мең вак һәм урта бизнес субъекты теркәлгән. Әмма алар арасында дәүләти яклаулар турында белүчеләр, алардан файдаланучылар күп түгел. Айрат Хәйруллин эшкуарлыкны үстерү департаментына эшкуарларга программалар турында мәгълүмат бирүне, документлар җыюда, заявкалар әзерләүдә булышуны, консультатив хезмәт күрсәтүне йөкләде.

Айрат Хәйруллин билгеләп үткәнчә, экономикада хәл җиңелдән түгел, әмма стратегик максат – азык-төлек иминлеген һәм бәйсезлеген тәэмин итү. Ә агросәнәгать комплексында үсешкә ирешү авыл хуҗалыгында җитештерүчеләрнең дәүләт дәрәҗәсендә булышлык чаралары турында хәбәрдар булуына нык бәйле.

Айрат Хәйруллин бюджет предприятиеләрен, мәктәпләргә һәм балалар бакчаларын туклану продуктлары һәм сәнәгать товарлары белән тәэмин итүчеләрнең дә игътибарын юнәлдерде: “Районда Токарликов исемендәге ААҖ була торып, итне Казаннан ташу белән һич килешеп булмый. Өстенлекле бурыч – үз районыбыздагы җитештерүчеләр белән эшләү. Бу – авылда эш урыннары да, терлекчелекне үстерү дә дигән сүз”.

Айрат Хәйруллин районда яңа юнәлешләрне үстерә башлау (җиләк-җимеш, яшелчә үстерү) мөмкинлеген карарга да тәкъдим итте.