ТР президены катнашында видеоконференция режимында киңәшмә

Бүген ТР президенты Рөстәм Миннеханов видеоконференция режимында киңәшмә үткәрде. Киңәшмәдә премьер-министр Илдар Халиков катнашты.

2015 елның 13 мартына Татарстанда 468,7 мең квадрат метр торак файдалануга тапшырылган: бу еллык биремнең 19,5 проценты дигән сүз. Социаль ипотека программасы буенча гомуми мәйданы 12,9 мең квадрат метр тәшкил иткән 262 фатирлы 22 йорт сафка бастырылган. Бу хакта ТР төзелеш, архитектура һәм ТКХ министры Ирек Фәйзуллин хәбәр итте.

Ирек Фәйзуллин сүзләренчә, 2015 ел башыннан ТР Дәүләт төзелеш күзәтчелеге инспекциясе һәм ТР буенча Дәүләт хезмәт инспекциясе тарафыннан 242 тикшерү үткәрелгән. Кагыйдә һәм хезмәтне саклау нормаларын бозган өчен гомуми күләме 2 миллион 319 мең сум тәшкил иткән 79 карар чыгарылган. Ел башыннан хезмәтне саклау буенча кагыйдә бозуларга юл куйган 53 оешма дисциплинар җаваплылыкка тартылган, 34 таныклыкның гамәлдә булуы туктатылган.

Арендага бирелә торган торакка килгәндә исә, 2015 елда әлеге программа кысаларында гомуми мәйданы 71 мең 399 квадрат метр тәшкил итәчәк 21 торак йорт төзү ниятләнгән. Бүгенгә гомуми мәйданы 8,1 мең квадрат метрлы 2 йорт сафка бастырылган.

Республикада шулай ук Бөек Ватан сугышының 65 ветераны өчен 10 йорт төзелә: 4 объект төзелеп беткән диярлек; уртача әзерлектә – 5 объект; түбән әзерлектә - 1 объект. Ирек Фәйзуллин искәрткәнчә, республикага 427,6 млн. сум күләмендә чираттагы транш килгән. Россия бәясе буенча, әлеге транш исәбенә 361 ветеран торак белән тәэмин ителәчәк. Ятим балаларның һәм ата-ана назыннан мәхрүм калган балаларның торакка хокукларын гамәлгә ашыру кысаларында, 2015 елда 331 ятим бала тораклы булачак.

Татарстан Республикасы «Россия гаиләсе өчен торак» программасын гамәлгә ашырырга кереште һәм 2017 елның 1 июленә кадәр 1,5 миллион квадрат метр эконом-класслы торакны файдалануга тапшырырга йөкләмә алды.

Хөкүмәт йортында шулай ук крестьян-фермер хуҗалыкларына җирне теркәү мәсьәләсе турында сөйләштеләр. Доклад белән ТР Премьер-министры урынбасары - авыл хуҗалыгы һәм азык-төлек министры Марат Әхмәтов чыгыш ясады.

Марат Әхмәтов хәбәр иткәнчә, крестьян-фермер хуҗалыкларында 281 мең гектар җир бар, аларның 156 мең гектары (ягъни 55 проценты) – дәүләт җирләрен арендалау, 60 мең гектар (21 проценты) – гражданнар милкендәге җирләр, 41 мең гектар (15 процент) – өлешле җирләрне арендалау, 7 мең гектар (3 процент) – даими сроксыз файдаланудагы җирләр.

Марат Әхмәтов сүзләренчә, кайбер муниципаль районнарда КФХлар ихтыяҗларына җирләрне теркәү мәсьәләсе берничә ел дәвамында хәл ителми, кайбер районнарда җирләрне арендалау бәясе кыйбат. Ул башкарма хакимият органнарын һәм районнар җитәкчелеген әлеге җитди мәсьәләгә игътибар итәргә өндәде.

ТР Авыл хуҗалыгы министрлыгы башлыгы муниципаль районнар башлыкларын КФКларга җирләрне бүлеп бирү, алар бәясен билгеләү мәсьәләсен, шулай ук җирдән файдалану өчен аренда түләүләрен билгеләүне контрольда тотарга өндәде. Ул җирләрне яңадан бүлеп бирү фондын булдыруны тәкъдим итте, анда файдалануга алынмаган җир өлешләре, эшкәртелми торган сөрү җирләре һәм нәтиҗәсез файдаланыла торган җирләр керә ала.

Видеоконференциядән соң Әлмәт муниципаль районы башкарма комитеты җитәкчесе вазифаларын башкаручы Айрат Хәйруллин шәһәр һәм район хезмәтләренең җитәкчеләре белән киңәшмә үткәрде, анда ветераннарны торак белән тәэмин итү, җир кишәрлекләре бирү, җирдән файдаланган өчен аренда түләве, юлларны ремонтлауга кагылышлы мәсьәләләр каралды.

- Бүген каралган мәсьәләләр аеруча игътибар бирүне һәм төгәл хәл итүне таләп итә, - дип йомгак ясады Айрат Хәйруллин. – Урамнарны тәртипкә китерү эшләре 1 майга кадәр тәмамланырга тиеш.