Мөхәммәт Галләм улы Сабировның якты истәлеге күңелләребездә озак сакланачак

9 мартта 1991-1995 елларда Татарстан Республикасының Премьер-министры булган Мөхәммәт Галләм улы Сабиров 83 нче яшендә вафат булды.

Мөхәммәт Сабиров 1932 елның 29 мартында Башкортстан АССРның Кушнаренко районы Яңа Кормаш авылында дөньяга килгән. Белеме буенча тау инженеры – 1965 елда Уфа нефть институтын тәмамлаган, соңрак (1983) СССР Министрлар Советы каршындагы Халык хуҗалыгы академиясендә дә укып чыккан. Халыкара мәгълүматлаштыру академиясенең мөхбир-әгъзасы була.

Мөхәммәт Галләм улының җитәкче булып формалашуы Әлмәт белән бәйле.

Хезмәт юлын ул 1955 елда “Әлмәтбурнефть” трестының 2нче бораулау конторасынды бораулаучы булып башлый. Аннары өлкән инженер, җитештерү-техника бүлеге башлыгы урынбасары, трест парткомының штатлы секретаре булып эшли. 1958 елда КПССка керә, 1965 елда партиянең Әлмәт шәһәр комитетының икенче секретаре итеп сайлана. 1968-1981 елларда “Востокмонтажгаз” тресты идарәчесе булып эшли, 1981-1984 елларда “Татнефтестрой” берләшмәсенә җитәкчелек итә.

ТАССР хөкүмәтенә эшкә М.Г.Сабиров 1984 елда Министрлар советы рәисе урынбасары булып килә, 1989 елдан ТАССР хөкүмәте җитәкчесе була. 1991 елдан 1995 елга кадәр Татарстан Республикасы премьер-министры була.

Мөхәммәт Галләм улы Россия Федерациясе Верховный советына депутат итеп сайлана (1990-1993 еллар). 1995-2000 елларда ТР Дәүләт Советы президиумы әгъзасы була.

Гомеренең соңгы елларында Татарстан халыклары тарихи-мәдәни мирасының “Туган җир – Родная земля” фондына җитәкчелек итте.

Озак еллар нәтиҗәле хезмәт куйган өчен Мөхәммәт Галләм улы ике тапкыр Хезмәт Кызыл Байрагы ордены, Почет Билгесе, Халыклар Дуслыгы орденнары, медальләр белән бүләкләнә. СССР Нефть-газ министрлыгы отличнигы (1978), Татарстан Республикасының атказанган төзүчесе (1982) исемнәренә лаек була.

Мөхәммәт Галләм улы Сабировның якты истәлеге күңелләребездә озак сакланыр.

А.Р. Хәйруллин, Н.У.Маганов, Ш.Ф.Тәхәветдинов, Р.Ф. Әбубакиров, В. Ф. Хуҗәхмәтов һәм башка рәсми затлар.