Бүген Әлмәттә ике әби 100 яшьләре тулуны билгеләп үтте

Бәгыйзә Шәрәфетдинова һәм Хөснелбанат Төхфәтуллина туган-тумачалары белән кунаклар кабул иттеләр. Аларга йөзәр яшь тулды.

Бәгыйзә Шәрәфетдинова сугышка кадәр кияүгә чыгып Сөләй авылына күчеп килә. Бөек Ватан сугышы башлануга аның ирен беренчеләрдән булып фронтка алалар. Авыр яраланганнан соң ул өйләренә кайта. Яралары төзәлүгә тагын сугышка җибәрәләр, бу юлы инде әйләнеп кайтмый, Смоленск тирәсендә һәлак була.

Еллар үтә тора. Үзе генә гомер итү җиңел булмагач, Бәгыйзә Җиһангир кызы тол калган Бакый Шәрәфетдиновка кияүгә чыга. Сугыштан соңгы авыр елларда колхоз эшенә йөри, илне сугыштан соң төзекләндерүгә хәл кадәренчә өлеш кертә. Ул оста тегүче дә була, үзенең “Зингер” машинасында матур күлмәкләр тегә. Ул машинка әле дә исән, мирас буенча туганының кызына күчкән (әби хәзер аның янында яши).

Хөснелбанат Төхфәтуллина ерак Себердә, Томск өлкәсендәге бер авылда туган. Мәктәптән соң тәрбиячеләр курсында укып чыга, үз авылларында балалар бакчасы мөдире булып эшли. 1936 елда Хөснелбанат тормышка чыга, тиздән яшь гаилә Ташкентка күчеп китә. 1941 елда ирен армиягә алалар, күп тә үтми, иренең үлү хәбәре килә. Сугыш елларында Хөснелбанат солдатлар өчен эчке киемнәр тегә, кулыннан килгәнчә фронтка ярдәм итә.

2001 елда Хөснелбанат апа кызы белән Әлмәт районының Габдрахман авылына күчеп урнаша. Аның кызы, 4 оныгы, оныкларының 8 баласы, аларының да 5 баласы бар.

Бүген хөрмәтле әбиләрне район башлыгы урынбасары Наҗия Хәйдәрова котлады, чәчәкләр һәм истәлекле бүләкләр тапшырды.