Әлмәттә 8 Март хөрмәтенә бәйрәм концерты булды

Халыкара хатын-кызлар көне хөрмәтенә концерт “Нефтьче” мәдәният сараенда булды.

Барлык ир-атлар исеменнән кадерле хатын-кызларны ӘМР башкарма комитеты җитәкчесе вазифаларын башкаручы Айрат Хәйруллин котлады. Айрат Ринатович залда бик күп чибәр хатын-кызлар утыруын, ләкин бәйрәмнең үзгә – ир-атлар өчен дә булуын әйтте.

- Әлмәт районында 109 мең хатын-кыз яши, - диде ул. – Мин бу котлау сүзләре аларның һәммәсенә дә барып ирешер дип ышанам. Сез – безнең таянычыбыз, йөзләрегез елмаюдан балкып торуын күрү шулкадәр күңелле.

Район башкарма комитеты җитәкчесе вазифаларын башкаручы ир-атлар белән бер сафта авыр сугыш елларында илебезнең бәйсезлеген яклап утка кергән хатын-кызлар адресына аерым рәхмәт сүзләре әйтте. Хатын-кызларның төп табигый бурычы ана булу икәнен искәртеп, ул залда утырган аналарга хөрмәтләп баш иде.

Айрат Хәйруллин “Ел хатын-кызы” республика конкурсының шәһәр этабында җиңүчеләргә бүләкләр тапшырды.

Райондагы вокаль, бию һәм инструменталь ансамбльләр катнашында концерт программасы тантаналы кичәдәге барлык гүзәл затларга бүләк булды.