Ул сугыш вакытында хәреф җыючы булган

Рус Акташы авылында үзенең иске генә өендә гомер итүче Анна Кирилловна, бераз сырхаулап китү сәбәпле, 90 яшен бер кызының квартирында каршылады. Чынында ул үз көнен үзе күрә, өен җыештыра, кәбестә-кишерен үстерә, идәнен юа, ашарга пешерә, карын да көри.

25 февраль иртәсендә аны котларга Рус Акташы авыл башлыгы Алексей Лазарев һәм участок дәваханәсендә бергә эшләгән хезмәттәшлере килде. Сәламәтлек саклау идарәсеннән, район үзәк дәваханәсеннән, социаль яклау идарәсеннән дә килгәннәр иде. Юбилярга РФ президентының һәм район җитәкчелегенң котлауларын тапшырдылар. Медицина көллияте студентлары Исламия Хафизова белән Лиана Иванова аның өчен фронт җырларын башкардылар.

Анна Кирилловнаның хәтере бик әйбәт. Ул 1941 елның февралендә 4 класс белеме белән район типографиясенә хәреф җыючы булып эшкә кергәнен бик ачык хәтерли. Район гәзите ул чакта “За сталинский урожай” дип аталган. “Көн-төн эш, йокларга да вакыт бик аз кала иде, - дип искә ала ул. – Гел ачлы-туклы яшәдек. 600 грамм ипи бирәләр иде, калганына кычыткан да кузгалак ашы. Чабата киеп иптәш кыз белән Бөгелмәгә я Шенталыга кәгазьгә йөри идек”. Типографиядә эшләгән елларында кыз ТАССР министрлар кабинеты каршындагы нәшрият һәм полиграфия идарәсенең мактау грамоталарына лаек була.

Пенсиягә чыгар алдыннан соңгы 15 елын Анна Кирилловна участок дәваханәсендә санитарка булып эшли. Ул чакта санитаркаларга шприцларны энә белән каннан чистарту, үткенләү кебек инде онытылган эшләр дә эшләргә туры килә.

Анна Кирилловна гомере буе үзе эрли, үзе бәйли. Белгәнен кызларына да өйрәтә. Хәзер аның 6 оныгы, оныкларыны 6 баласы, инде аларның да 1 баласы бар.