Сәнәгать предприятиеләренең төп проблемасы – продукцияне сату

Бүген кризиска каршы штабның чираттагы утырышы булды. Аны район башкарма комитеты җитәкчесе Марат Гыйрфанов үткәрде.

Утырыш хезмәт базарында хәлнең торышы турында мәгълүматтан башланды, аны мәшгульлек үзәге директоры Минсәгыйт Насертдинов җиткерде.

Район экономика, сәнәгать һәм сәүдә идарәсе башлыгы Светлана Лаптева тормыш дәрәҗәсен күтәрү һәм керемнәрне легальләштерү буенча ведомствоара комиссиянең эше турында сөйләде, “соры” хезмәт базарын ачыклау буенча рейдлар дәвам итүен әйтте. Социаль әһәмиятле азык-төлек товарларының бәяләрен нигезсез күтәрүне ачыклау буенча да рейдлар була.

Әлмәт икмәк заводы директоры Рәсим Хәйретдинов предприятиедәге хәлгә тискәре йогынты ясаучы сәбәпләр турында сөйләде, беренче ярты елда 30га кадәр штат берәмлеген кыскартырга планлаштыруларын әйтте.
РайПО идарәсе рәисе Җәлил Насретдинов штатларны кыскартырга җыенмый, әмма аларның да проблемалары җитәрлек икән.

Сәнәгать предприятиеләре алдындагы беренче проблемаларның берсе – продукцияне сату. Җирле җитештерүчеләргә бәрәңгеләре, ипиләре, сөтләре белән федераль сәүдә челтәренә керү мөмкинлеге юк, ә үз кибетләрен файдага эшләтеп булмый.

- Тагын бер тапкыр кабатлыйм, тук заманнар артта калды. Билләрне ныграк кысарга туры килә. Әмма кисәтеп куям: шау-шудан файдаланып, ниндидер бүтән проблемаларны хәл итәргә уйламагыз, - дип йомгак ясады Марат Гыйрфанов.