Беренче тапкыр буларак татар гөслә көйләрен туплаган диск дөнья күрде

Республика традицион мәдәниятне үстерү үзәге «Звучат татарские гусли» дип исемләнгән җыентык чыгарды. Ул ике компакт-дисктан тора: CD һәм DVD. Эчтәлеген танылган музыка белгече-фольклорчы Эльмира Каюмова 2013 елда ТРның Балтач районында язып алган музыкаль үрнәкләр тәшкил итә. Әлеге экспедиция Республика традицион мәдәниятне үстерү үзәге тарафыннан оештырылган иде. Проектның җитәкчесе – Фәнзилә Җәүһәрова. Хәзер инде, аутентик гөслә көйләрен ишетү белән беррәттән, уен коралының төзелеше, башкару тәртибе белән дә танышырга мөмкин. Дисклардан тыш, 12 биттән торган буклет та бар. Анда гөсләчеләр турында, аларның репертуары, уйнау рәвеше һәм башка төрле мәгълүмат урын алган. Фотолар да бирелгән.

Үзенчәлеге тагын шунда ки, бу аудиовидео җыентык бер үк вакытта өч серияне ачып җибәрә: «Музыкальное наследие татарского народа» дигән гомуми серияне һәм аның эченә керүче «Полевые записи фольклориста Э.Р. Каюмовой», «Звучат татарские гусли» серияләрен.

Басманың максаты уникаль һәм югалып бара торган халык сәнгатен саклау гына түгел. Әлеге материаллар зур фәнни-гамәли кыйммәткә ия. Аларны фәнни хезмәтләр язуда, укыту процессында да файдаланырга мөмкин. Башкаручылар өчен кирәкле методик кулланма булып торачак. Тиздән музыка уен коралларында уйнаучылар (солистлар һәм ансамбльләр) матур гөслә көйләрен репертуарларына кертер дип ышанасы килә, диелә Татарстан Республикасы Мәдәният министрлыгының матбугат хезмәте хәбәрендә.