Кичүчат авылында 2014 елда башкарылган эшләргә нәтиҗә ясалды

Әлмәт районы авылларында отчет җыелышлары дәвам итә. Узган атнада Кичүчат авылы җирлегендә 2014 ел дәвамында башкарылган эшләргә йомгак ясалды. Җыелышта Әлмәт муниципаль районы башкарма комитетының авыл җирлекләрендә инфракструктураны үстерү бүлеге җитәкчесе Гөлнара Гатина, авыл җирлеге башлыгы Рафик Мингалимов, “Кичүчат” хуҗалыгы җитәкчесе Җәмил Сафиуллин, төрле служба вәкилләре, авыл халкы катнашты.

Авыл җирлеге башлыгы Рафик Мингалимов чыгышыннан күренгәнчә, Кичүчатта 378 хуҗалык, 1006 кеше исәпләнә, ел дәвамында 4 бала туган. 2014 ел дәвамында авыл бюджетына төрле салымнардан 2 млн 912 мең сум акча җыелган. Бу акча хезмәт хакына, урам утларына һәм башка чыгымнарга тотылган. Рафик Рәфкать улы авыл өчен мөһим булган бәйрәмнәр – 9 Май, Сабантуй, Өлкәннәр көне, Корбан ашлары уздыруда һәрвакыт ярдәм итүче депутатлар һәм авылдашларының да исемнәрен атады.

Инфраструктура үсеше, социаль – көнкүреш объектлары эшчәнлеге буенча торак пунктта җитешсезлекләр юк дәрәҗәдә. Урта гомуми белем бирү мәктәбендә 94 укучы белем ала, район һәм республика олимпиадаларында ирешелгән уңышлары куандырырлык дини – әхлакый тәрбия бирү буенча да Кичүчат мәктәбе районда база булып санала, биредә күп санлы гамәли конференцияләр, чаралар уздырыла.

Авылның “Ләйсән” балалар бакчасына 32 бала йөри, ике төркем эшли. Бакчага йөрүчеләр өчен мөмкин булган кадәр уңайлыклар тудырылган, шулай да бинаның төзелүенә 21 ел вакыт узуын һәм бер тапкыр да капиталь ремонт үткәрелмәвен исәпкә алганда, бу мәсьәләне хәл итү юлларын табу ихтыяҗы көн кебек ачык.

Авыл җирлеге башлыгы билгеләп узганча, үз финанслану программасының Кичүчат авылы халкы тарафыннан киң яклау тапмавы гына кызганыч. Узган елның декабрь аенда халыктан нибары 86700 сум акча җыелган. Дәүләт тарфыннан 4 тапкырга арттырып бирелә торган әлеге суммага яңа урамнарның берсенә юл салу күздә тотыла.

“Кичүчат” – Әлмәт районының башка авыл хуҗалыгы предприятиеләре арасында тотрыклы эшчәнлеге һәм югары нәтиҗәләре белән аерылып тора. Хуҗалык җитәкчесе Җәмил Сафиуллин сүзләренә караганда, ел дәвамында 54 млн 516 мең сумлык авыл хуҗалыгы продукциясе генә җитештерелгән, 2014 елда хезмәт хакы уртача 22 мең 900 сум тәшкил итә. Предприятиенең социаль – икътисади күрсәткечләре уңай, узган ел үз средстволарына азык җыю комбайны алынган, язгы кыр эшләренә әзерлек 90 процентны тәшкил итә. Хуҗалык җитәкчесе билгеләп үткәнчә, алар үз эшчәнлекләрен бернинди бурычларсыз һәм кредитларсыз гына алып баралар.

Җыелышның икенче өлеше гадәттәгечә авыл кешеләрен борчыган сорауларга җавап бирүгә багышланды. “Кичүчат” хуҗалыгында җитештерлгән итне авыл кибетеннән сатып алу мөмкинлеге, яр ишелмәсен өчен елга буйларына агач утырту, яңа урамга юл салуга кагылышлы мәсьәләләр чагылыш тапты халык җыенында.

Фәрдия Хәсәнова