Әлмәттә герой шагыйрь Муса Җәлил истәлегенә багышланган Бөтенроссия көрәш турниры тәмамланды

Быел бу турнир беренче тапкыр Әлмәт җирендә Бөтенроссия статусында үтте. “Татнефть” ААҖ спорт комплексында турнирны ачу тантанасында катнашучыларны Әлмәт районы башлыгы Мәҗит Салихов сәламләде.

Бөтенроссия статусындагы турнирның шундый үзенчәлеге бар, анда 1нче урын алучыга Россия спорт мастеры дигән исем бирелә. Икенче урын алучылар спорт мастерлыгына кандидат була.

Татарстан җыелма командасында Әлмәттән 4 спортчы, 18 яшькә кадәргеләр арасында тагын бер көрәшче – Радик Гафуров бар иде. Күп ярышларда җиңү яулаган Әлмәт батырларына үз шәһәрләрендә үткән шундый мәртәбәле бәйгедә сынатмау бигрәк тә мөһим иде. Данлыклы оста Ильяс Галимов оештыручылар командасында булу сәбәпле келәмгә чыга алмаса да, аның иптәшләре Әлмәт данын төшермәде. Аларга якташлары, дуслары көч биреп торды. Марсель Гозәеров, Айвар Билалов, Руслан Нургалиев беренче батыр булдылар, Рамил Синякаев икенче урын яулады.

Яшьтәшләре арасында Радик Гафуров та барлык көндәшләрен җиңеп чыкты.

Хәзер безнең көрәшчеләр 12-14 февральдә Биектау районында булачак ярышка әзерләнәләр.