Татарстанда 18 яшьтән өлкәнрәк 18,6 мең кеше беренче тапкыр инвалид дип табылган

Бүген РФ Хезмәт һәм социаль яклау министрлыгы ТР буенча Баш медицина-социаль экспертиза бюросынының 2014 елгы эшчәнлегенә йомгак ясауга һәм 2015 елга бурычлар билгеләүгә багышланган коллегия утырышы уздырылды. Анда ТР вице-премьеры Васыйл Шәйхразиев, РФ Дәүләт Думасы депутаты Илдар Гыйльметдинов, ТР Дәүләт Советының социаль сәясәт буенча комитет рәисе Светлана Захарова, Татарстанда кеше хокуклары буенча вәкаләтле Сәрия Сабурская катнашты.

РФ Хезмәт һәм социаль яклау министрлыгының ТР буенча Баш медицина-социаль экспертиза бюросы җитәкчесе Ригель Низамов сүзләренә караганда, былтыр медицина-социаль экспертизасы буенча бюрога 69 меңгә якын кеше мәрәҗәгать иткән. 18 яшьтән өлкәнрәк 20,3 меңнән артык кеше беренче тапкыр тикшерү узган. Аларның 18, 6 меңе, ягъни 91 проценты инвалид дип табылган. Шул рәвешле, беренче тапкыр инвалид дип табылучыларның саны, 2013 ел нәтиҗәләре белән чагыштырганда, 5 процентка кимегән. Беренчел инвалидлык күрсәткеченең иң югары дәрәҗәсе Тукай, Апас, Мамадыш районнарында теркәлгән.

ТР буенча Баш медицина-социаль экспертиза бюросы җитәкчесе инвалидлыкка китергән сәбәпләр рейтингын аерып күрсәтте. Аның сүзләренчә, алар арасында беренче урынны кан әйләнеше системасы авырулары (33 процент), икенче урынны яман шеш (28 процент) һәм өченче урынны сөяк-мускул системасы авырулары (11 процент) алып тора.

Ригель Низамов балалар инвалидлыгы дәрәҗәсенең артуына да игътибар юнәлтте. Былтыр 1982 бала беренче тапкыр инвалид дип танылган. Сабыйларның беренчел инвалидлык дәрәҗәсенең иң югары күрсәткече Татарстанның Кама Тамагы, Мөслим, Әгерҗе, Теләче һәм Югары Ослан районнарында күзәтелгән.

ТР Премьер-министр урынбасары Васыйл Шәйхразиев 18 яшьтән өлкәнрәкләр арасында беренчел инвалидлык дәрәҗәсенең 2013 елдагыдан кимүен уңай бәяләп, аның республика халкының гомуми сәламәтлеге күрсәткечләренең берсе булуын билгеләп узды. Әмма, шул ук вакытта, беренчел инвалидлык структурасында беренче группа инвалидларының артуына игътибар юнәлтте. Бу уңайдан ул ТР буенча Баш медицина-социаль экспертиза бюросына әлеге хәлнең сәбәпләрен ачыклау бурычын йөкләде.

Васыйл Шәйхразиев хезмәткә яраклы яшьтәгеләрдә беренчел инвалидлык дәрәҗәсенең артуы турында сөйләп, әлеге күрсәткеч буенча Татарстанның Идел буенда иң алдынгы урыннарда булуын билгеләп узды. “Бу уңайдан Республика районнары күрсәткечләре арасындагы коточкыч зур аерма гаҗәпләндерә. Хезмәткә яраклы яшьтәгеләр арасында беренчел инвалидлыкның иң түбән күрсәткечләре Яңа Чишмә, Тәтеш районнарында күзәтелсә, иң югарылары Апас, Әлки районнарында теркәлгән. Шул ук вакытта Яңа Чишмә белән Әлки районы, Апас белән Тәтеш районы бер-берсеннән әллә ни ерак урнашмаган. Шуңа бәйле рәвештә, мондый кискен аерманың сәбәпләренә төшенергә кирәк”, – диде ул үзенең чыгышында.

Васыйл Шәйхразиев хезмәткә яраклы яшьтәгеләр арасында ямаш шеш авырулы белән беренчел инвалидлыкка чыгучыларның артуын билгеләп узды. Андыйлар арасында үлүчеләр саны да елдан-ел күбәя, диде ул.
Васыйл Шәйхразиев балалар инвалидлыгы дәрәҗәсенең артуын тискәре күренеш буларак бәяләп, моның ТР Самәтлек саклау министрлыгы эшчәнлегенең бер юнәлеше булырга тиешлегенә басым ясады.