Энгель Фәттахов гыйльми даирәгә, фәнни хезмәткәрләргә һәм укучы яшьләргә мөрәҗәгать белән чыкты

8 февраль - Россия фәне көне уңаеннан, ТР Премьер-министры урынбасары – ТР мәгариф һәм фән министры Энгель Фәттахов гыйльми даирәгә һәм укучы яшьләргә мөрәҗәгать белән чыкты.

“Хөрмәтле галимнәр, фәнни хезмәткәрләр, укытучылар, аспирантлар һәм студентлар!

Чын күңелдән Сезне һөнәри бәйрәмегез – Россия фәне көне белән котлыйм!

Бүген без перспективалы фәнни идеяләр эзләүче, заманча технологияләр уйлап табучы, инновацион тирәлек булдыручы һәм икътисадыбызның уңышлы яңартылуына ярдәм итүчеләребезне тәбриклибез. Нәкъ менә сезнең хезмәтегез нәтиҗәсендә, фәнни фикерләү һәм техник алгарыш камилләшүен дәвам итә.

Бүгенге көндә фәнни эшчәнлек өлкәсендә интеллект, акыл һәм белем мөһим урын алып тора. Республикабыз фәнни комплексы киләчәгенә зур ышаныч һәм өмет белән карый алабыз. Фәнни оешмаларның гомуми саны буенча безнең төбәк Идел буе федераль округында алдагы урыннарны алып тора, ә фән һәм технологияләр өлкәсе бөтен төрле тикшеренү үзәкләренә хас булган сыйфатларны үзенә туплаган.

Соңгы елларда Татарстан еш кына әһәмиятле халыкара симпозиумнар, форумнар, съездлар һәм конференцияләр үткәрү мәйданы булып тора. Бу исә Җир шарының төрле почмакларында яшәүче галимнәрнең республикабыздагы фәнни мәктәпләрнең атаклы казанышларын тануы хакында сөйли.

Фәнни тикшеренүләр белән шөгыльләнүче һәркемгә яңа ачышлар, гадәти булмаган уңышлы проектлар һәм уйлап табулар, иҗади уңышлар телим!

Булачак яшь галимнәргә - студентларга һәм аспирантларга, тормышын фән белән бәйләргә теләүчеләргә аерым мөрәҗәгать итәсе килә. Алдыгызга куйган максатларыгызга ирешүегезне, остазларыгыз тәҗрибәсен үзләштерүегезне телим.

Сезгә һәм гаиләгезгә сәламәтлек, уңышлар һәм иминлек юлдаш булсын!” – диелә профильле министр Э.Н.Фәттаховның котлау текстында.