Алдагы 10 елда Россиядә табигый бәла-казалар саны ике тапкыр артырга мөмкин

Россиядә алдагы 10 елда табигый бәла-казалар саны ике тапкыр артырга мөмкин. Бу хакта РФ табигый ресурслар һәм экология министры Сергей Донской министрлыкның 15нче Тотрыклы үсеш саммитында чыгыш ясаган вакытта белдерде.

"Россиядә 1990 елдан башлап 2010га кадәр куркыныч табигать күренешләре саны дүрт тапкыр диярлек артты һәм елга якынча 6-7 процентка күбәя бара, дип китерә аның сүзләрен ТАСС. - Соңгы елларда зур күләмле табигый бәла-казалар, иң беренче чиратта су басулар һәм урман янгыннары саны, берничә тапкыр артты. Россия галимнәре мәгълүматларына караганда, алдагы 10 елда куркыныч табигать күренешләр саны ике тапкыр артачак".

Донской шулай ук Россиядә төрле хәвефле табигать күренешләре аркасында килгән еллык зыянны 30-60 миллиард сумга бәяләде (тулаем эчке продуктның 0,07-0,15 проценты).

Аның сүзләренчә, 2013 елда Россия территориясендә күзәтелгән табигый бәла-казаларның саны 963кә җиткән. "Бу 2012 ел белән чагыштырган вакытта бераз кимрәк, ул чакта 987 бәла-каза теркәлгән, аларның 476сы 200 миллиард сумнан артык зыян китергән һәм 190 кешенең гомерен өзгән", - дип белдерде министр.