Мәдәният елында Әлмәттә 8 меңләп гаммави мәдәният чаралары үткәрелде

4 февральдә “Нефтьче” мәдәният сараенда район мәдәният идарәсенең 2014 елгы эшенә хисап ясау җыелышы булды. Эшләнгән эшләр турында төп доклад белән идарә башлыгы Гүзәл Пайдуллина чыгыш ясады. Ул күп юнәлешләр буенча елның уңышлы һәм нәтиҗәле үтүен, мөһим мәдәни вакыйгаларга тулы булуын билгеләп үтте. Мәдәният елындагы иң мөһим вакыйгалар дип докладчы Әлмәт татар дәүләт драма театрының 70 еллыгын һәм Р.Нәгыймов исемендәге 1нче музыка мәктәбенең 50 еллыгын билгеләп үтте. “Иске Әлмәт” мәдәният йортын яңартканнан соң кабат ачу, драма театрын тышкы яклап яңарту Мәдәният елында “Татнефть” ААҖ тарафыннан зур бүләк булды.

Әлмәт районы мәдәният учреждениеләре тарафыннан 2014 елда барлыгы 8 меңләп гаммави мәдәният чаралары үткәрелгән.

Чыгышының ахырында Гүзәл Пайдуллина мәдәният хезмәткәрләре исеменнән булышлык күрсәтүләре өчен район җитәкчелегенә рәхмәт сүзләрен җиткерде.