Татарстанда "Кадрлар резервы" проектының I этабы тәмамланды

"Идел" яшьләр үзәгендә "Кадрлар резервы" республика проектының беренче этабы тәмамланды. Быел проектта Татарстанның 24 районыннан 16дан алып 30 яшькәчә булган 155 егет һәм кыз - эшче яшьләр вәкилләре һәм вуз студентлары катнашты.

Республика проекты кысаларында алар меңнән артык көндәшләрен артта калдырып, үзләренең шәхси казанышлары һәм эшлекле сыйфатларын күрсәтеп, сынау өчен оештырылган әңгәмәләшүне уңышлы узган.
Беренче этап кысаларында алар идарә һәм оештыру эшчәнлегенә, креатив фикер йөртергә өйрәнде.

Проект катнашучыларга танылган сәясәтче, дәүләт хакимияте органнары вәкилләре һәм идарәчеләр белән шәхси аралашу мөмкинлеген бирде. Беренче этап кысаларында биш көн дәвамында ТР Президенты ярдәмчесе Ләйлә Фазлыева, ТР Инвестицион үсеш агентлыгы җитәкчесе Талия Миңнуллина, ТР Президентының коррупциягә каршы сәясәт мәсьәләләре идарәсенең оештыру бүлеге мөдире Алексей Панкратов, ТР Президентының коррупциягә каршы сәясәт мәсьәләләре идарәсе белгече Андрей Петухов һәм Татарстан Республикасының III класслы хакыйкый дәүләт киңәшчесе Ленар Сафиуллин "Кадрлар резервы" проектына мастер-класслар үткәрү өчен килде.

"Кадрлар резервы" республика проектының беренче этабы Казан территориясендә 30 гыйнварда узган 9 социаль акция белән тәмамланды. Алар Россиядә үткәрелә торган Әдәбият елына, Бөек Ватан сугышында җиңүнең 70 еллыгына, шулай ук сәламәт яшәү рәвешен пропагандалауга багышланды.

"Кадрлар резервы" проектының киләсе этабы - дистанцион рәвештә март азагына кадәр үткәрелә, дип хәбәр итә проектның матбугат хезмәте.