ТР Урман хуҗалыгы министрлыгының коллегия утырышы узды

ТР Урман хуҗалыгы министрлыгы коллегиясенең 2014 елда башкарган эшләренә багышланган киңәйтелгән утырыш булды. Әлеге министрлык бинасында уздырылган чарада ТР Премьер-министрының беренче урынбасары Алексей Песошин, Урман хуҗалыгы федераль агентлыгы җитәкчесе урынбасары Михаил Клинов, Идел буе федераль округы буенча урман хуҗалыгы департаменты җитәкчесе урынбасары Николай Кузьмин, ТР Муниципаль берәмлекләр советы рәисе Минсәгыйть Шакиров һ.б. катнашты.

ТР Урман хуҗалыгы министры Алмас Нәзиров сүзләренчә, республикада 1,3 мең гектар чамасы урман бар. Бу — Татарстан территориясенең 17,5 проценты дигән сүз. Дәүләт урман реестры мәгълүматлары буенча, республикада 190,3 миллион куб метр урман ресурслары исәпләнә, ә ел саен Татарстанда 2 мең куб метрдан артык урман киселә.

Алмас Нәзиров чыгышында әйтеп үткәнчә, республикада урманнарны торгызу буенча планлы зур эш алып барыла. Узган ел, мисал өчен, 2,5 мең гектар территориядә шундый эшләр башкарылган, шулардан 2,2 мең гектарга якын җирдә урман утыртылган. Утыртылган үсентеләр Татарстанның 55 урман питомникларында үстерелгән.

2014 елда “Урман утырту көне” акциясенең киң колач җәюенә министр аерым басым ясады. 26 март көнне уздырылган бу чарада гади мәктәп укучыларыннан алып дәүләт эшлеклеләре, җитәкчеләргә кадәр катнашкан иде. Нәтиҗәдә, Татарстан территориясенә 710 мең кеше 3,8 миллион төп агач утырткан. Шул рәвешле, республика урманнары 418 гектарга арткан.

Алмас Нәзиров ТР Урман хуҗалыгының урманнарны саклау, корткычлардан арындыру, янгынга каршы чаралар күрүен искәртте. Соңгы берничә елда Татарстан урманнарында бер генә янгын очрагы да булмау - моның ачык мисалы.

2015 ел Татарстанда Парк һәм скверлар елы дип игълан ителде. Шул уңайдан, республика территориясендә тагын 700 гектар мәйданда аллеялар, парк һәм скверлар барлыкка киләчәген министр әлеге киңәшмәдә хәбәр итте.

Утырыш ахырында тармак алдынгыларына дәүләт бүләкләре тапшырылды, мактау сүзләре әйтелде.