Ветераннар өчен уңайлыклы палаталар

“Кадерле ветераныбыз” республика социаль-гуманитар проектын гамәлгә ашыру кысаларында Әлмәт районында Бөек Ватан сугышында катнашучылар өчен аеруча уңайлыклы 25 медицина палатасы тәгаенләнде. Проектның максаты һәм бурычлары – кирәкле барлык җиһазлар булдырып, палатада өй шартларына якын шартлар тудыру, ветераннар белән очрашканда-сөйләшкәндә аеруча игътибарлы булу.

Проект “Бердәм Россия” партиясенең Татарстан төбәк бүлеге тарафыннан ТР сәламәтлек саклау министрлыгы һәм “АК БАРС – Мед” иминият компаниясе белән берлектә тормышка ашырыла. Ремонт эшләрен финанслауда һәм палаталарны тиешенчә җиһазлауда район башлыгы Мәҗит Салихов, ТР Дәүләт Советы, ӘМР, шәһәр советлары депутатлары, предприятие җитәкчеләре, медицина учреждениеләренең персоналы актив катнаша.

Палаталарның 10ысы медсанчастьта, 10ысы Үзәк район хастаханәсе бүлекләрендә, 1әр палата 3нче поликлиникада, туберкулез һәм тире-венерология диспансерларында.