Татарстанда иректән мәхрүм итү урыннарында былтыр 69 кеше вафат булган

2014 нче елда Татарстанда иректән мәхрүм итү урыннарында 69 кеше вафат булган, шул исәптән 9ы туберкулездан, 12 се ВИЧ-инфекциядән үлгән. Әлеге мәгълүматларны бүген Җәзаларны үтәтү федераль хезмәтенең Татарстан Республикасы буенча идарәсенең ТР Премьер-министры Илдар Халиков катнашында узган киңәйтелгән коллегия утырышында идарә башлыгы Дәүфит Хәмәдишин хәбәр итте.

Идарә башлыгы, төп доклад белән чыгыш ясаганда, рәшәткә артында утыручыларны медицина ярдәме белән тәэмин итү мәсьәләсенә тукталды. Аның әйтүенчә, махсус учреждениеләргә килеп эләккәннәрнең 85 процент өлеше чирле була. “Төзәтү учреждениеләрендә медицина хезмәте күрсәтү буенча, элеккечә, бик күп шикаятьләр килеп тора, гәрчә аларның күбесе иректә вакытта табиблар ярдәмен мондагы кадәр алмаса да”, - дип белдерде Дәүфит Хәмәдишин.

Идарә җитәкчесе сүзләреннән аңлашылганча, соңгы елларда туберкулез белән авыру һәм аннан үлеп китү күрсәткечләре кискен начарайган. Дәүфит Хәмәдишин ассызыклагача, авыруларны вакытында изоляцияләмәү – моның төп сәбәбе.

Тулаем алганда, хөкем ителгәннәр арасында авыру күрсәткече 18 процентка кимегән. “Хөкем ителгәннәрне сәламәтлек торышы белән бәйле рәвештә хвакытыннан алда азат итү турындагы үтенеч белән идарә тарафыннан судка 18 материал тапшырылган иде. Шул рәвешле, 4 кеше иреккә чыгарылды, ә 8 кеше судка кадәр җан бирде”, - дип белдерде Дәүфит Хәмәдишин.

Утырышта билгеле булганча, Җәзаларны үтәтү идарәсе елга якын бик каты авыручы хөкем ителгән 2 затның иреккә чыгарылуына ирешергә тели. Идарә җитәкчесе әйтүенчә, 18 нче төзәтү колониясенә ябылган шушы кешеләрне азат итү турындагы үтенеч белән оешма хезмәткәрләре берничә тапкыр судка мөрәҗәгать иткән. Әмма әле нәтиҗәсе юк: суд үтенечне һаман канәгатьләндерми.

Илдар Халиков бу нисбәттән үз фикерен белдереп, республика прокуратурасына бу мәсьәләгә игътибар юнәлтергә фәрман бирде.

Коллегия утырышында катнашкан ТР прокуроры Илдус Нәфыйков исә, үтә дә авыр җинаять кылган затлар, ничек кенә нык авырса да, вакытыннан алда иреккә чыгарылырга тиеш түгеллеген билгеләп узды.