Татарстанда “Дакар” раллиенда җиңүчеләрне каршы алдылар

Бүген төнлә Чаллыга “Дакар-2015” раллие җиңүчеләре – “КАМАЗ-Мастер” командасы кайтты. Алар раллида 13 нче тапкыр җиңүче булды. Чемпионнар утырган самолет 22.54 сәгатьтә “Бигеш” аэропортына төште.

Традиция буенча ралли җиңүчеләрен туганнары, күп санлы җанатарлар, шәһәр һәм “КАМАЗ” ААҖ җитәкчелеге каршы алды. Җиңүчеләрне “КАМАЗ” ААҖ генераль директоры Сергей Когогин, шәһәрнең Башкарма комитеты җитәкчесе Наил Мәһдиев һәм башка рәсми затлар каршы алды.

Сергей Когогин шәхсән үзе һәм завод хезмәткәрләре исеменнән команданы котлады: “Катлаулы узышлар узды, әлбәттә, өйдәге кебек беркайда да җылы каршы алмыйлар. Узышчылар бу минутларны көтте, алар безнең шәһәргә, безнең командага җиңү алып килде һәм Чаллыдагы кебек тугры җанатарлар беркайда да булырга мөмкин түгел. Без сезне яратабыз, сезнең белән горурланабыз. Сез – илебез, шәһәребез һәм “КАМАЗ” горурлыгы. Рәхмәт сезгә, сез - чын батырлар!” - диде.

Аэропортта җиңүчеләргә котлау сүзләре белән Чаллы шәһәре Башкарма комитеты җитәкчесе Наил Мәһдиев тә мөрәҗәгать итте. “Чаллы халкы сезнең белән горурлана. Чираттагы тапкыр безнең спортчылар, безнең йөк машиналары иң яхшылар булуын исбатладык. Сез – безнең заманның, безнең шәһәрнең чын геройлары!” - диде ул.

Россия “КАМАЗ”лары һәм аларның көндәшләре 3000 км дан артык комлы юл узды. Ралли Боливия, Аргентина һәм Чили - өч дәүләт территориясендә үтте, узыш финишы һәм старты Буэнос-Айреста булды.