“Район башлыгына сорау бир” рубрикасына килгән сорауга җавап

Барлык сорау-җавапларны да без яңалыклар тасмасында биреп барабыз. Вакыйгаларны күзәтеп торыгыз. Әгәр дә берәр сәбәп белән гражданнарның ӘМР интернет-порталы аша “Район башлыгына сорау бир” рубрикасына мөрәҗәгатенә җавап яңалыкларда табылмаса, аны “Сорауларга җаваплар” бүлегендә һәрвакыт табарга була. Текстларда сорау авторының һәм җавапның стилистикасы саклана.

Сорау: Исәнмесез, Мәҗит Хаҗипович! Завод урамында юл кайчан төзекләндерелер икән, шуны беләсе килә. Монда транспорт күп, ә җәяүлеләр өчен шартлар юк. Эшләүчеләр үз машиналарын тротуарга куялар. Кыш көне юл чистартканда да карны тротуарга өяләр. Язын-көзен күлләвекләр җыелып тора, җәяүлеләргә су чәчри. Троллейбуска чыгып җиткәнче чиста калу проблема. Завод урамындагы 1-13 йортлар арасындагы юлны да асфальтлау турында уйларга кирәк. Без, шул урамда яшәүчеләр, моң-зарларыбыз Сезгә барып ирешер, проблеманы хәл кылырга ярдәм итәрсез дип өметләнәбез.

Җавап: Завод урамында юл капламын төзекләндерү мәсьәләсе карауга алынды. Бу урамны төзекләндерү мәсьәләсен хәл итү мөмкинлеге 2015 елда муниципаль берәмлек бюджетында лимитның күләменә бәйле булачак.