Ел башыннан бирле Татарстанда 94,7 мең кв. м. торак файдалануга тапшырылган

Бу хакта ТР Хөкүмәте йортында уздырылган республикакүләм киңәшмәдә ТР төзелеш, архитектура һәм ТКХ министры Ирек Фәйзуллин хәбәр итте. Киңәшмәне мунициципаль районнар белән видеоконференцэлемтә режимында Татарстан Президенты Рөстәм Миңнеханов уздырды.

Төзелеш министры хәбәр иткәнчә, 2015 ел башыннан бирле торак төзелеше программасын гамәлгә ашыру эше республиканың барлык муниципаль берәмлекләрендә дә дәвам иттерелә.

Социаль ипотека программасы кысаларында, 2015 елның 16 гыйнварына күрсәткечләр буенча, 186 фатирлык 9 мең кв. метр гомуми мәйданлы 8 торак йорт файдалануга тапшырылган. Программаның төзелү объектларыннан 62се – югары әзерлек дәрәҗәсендә, уртача әзерлектә – 37 объект, түбән әзерлектәгесе – 38 объект.

Ирек Фәйзуллин искәрткәнчә, республикада Бөек Ватан сугышының 66 ветераны өчен 11 йорт төзелеп килә. Югары һәм түбән әзерлек дәрәҗәсендә – 2 шәр объект, уртача әзерлектә – 7 объект. Бөек Ватан сугышында Җиңүнең 70 еллыгын бәйрәм итү җәһәтеннән, Татарстанда 2015 елның 9 маена кадәр 25 ветеран өчен 6 торак йортны файдалануга тапшыру планлаштырыла. 2015 елның 9 маеннан соң төзелеш эшләре графиклары нигезендә 29 ветеранга 5 торак йортны файдалануга тапшыру күздә тотыла.

Министр хәбәр иткәнчә, быел 331 ятим баланы торак урыны белән тәэмин итү каралган. Бу максатларга федерация һәм республика бюджетларыннан 356 млн. 420 мең сум киләчәк.

Моннан тыш, быел 5 һәм аннан да күбрәк балалары булган гаиләләрне торак белән тәэмин итүгә Татарстан бюджетында 128 млн. 101 мең сум каралган. Торак Татарстан Республикасы Президенты каршындагы Дәүләт торак фонды аша биреләчәк.

«Авыл клублары» программасы кысаларында 2015 елда 42 клуб төзеләчәк һәм бер клубка (Казандагы «Полимер» МЙ) капиталь ремонт ясалачак.

Социаль ипотека программасын гамәлгә ашыру турында доклад белән Татарстан Республикасы Президенты каршындагы Дәүләт торак фонды башкарма директоры Тәлгать Абдуллин чыгыш ясады.