Республикада укытучыларның “Татарстан Республикасы ел укытучысы – 2015” һөнәри конкурсы башлана

Иҗади сәләтен эшкә җигеп хезмәт куючы педагогларны кызыксындыру, аларга ярдәм күрсәтү, укытучы һөнәренең абруен үстерү, республиканың мәгариф системасын камилләштерүгә юнәлтелгән перспективалы мәгариф идеяләре һәм аларны гамәлдә куллануны популярлаштыру, педагог һөнәре турында уңай фикер формалаштыруны максат итеп үткәрелә торган “Татарстан Республикасы ел укытучысы – 2015”, “Татарстан Республикасы математика укытучысы – 2015”, “Татарстан Республикасы физика укытучысы – 2015”, “Татарстан Республикасы химия укытучысы – 2015” бәйгеләренең муниципаль этабы 16 февральдән уздырыла башлаячак.

Конкурста кимендә 5 ел өзлексез рәвештә мәктәптә эшләгән укытучылар катнашырга мөмкин. Иң элек иң яхшыларны мәктәпләрдә билгелиячәкләр. 16-28 февральдә район этаплары үтәчәк. Анда җиңгән мөгаллимнәр 5-28 мартта зона этабында көч сынышачак. Бәйгенең соңгы туры 13-17 апрельдә Казанда уза. “ТР Ел укытучысы – 2015” конкурсының шигаре рәвешендә заманча мәгарифнең төп бурычларыннан берсе саналган, укытучының туктаусыз һәнәри һәм шәхси үсеше, иң яхшы педагогик практика үрнәкләрен тарату һәм инновацион фикерләрне һәм казанышларны алга сөрү бурычы сайланган – “Укытырга һәм укырга!”

Конкурс ТР Мәгариф һәм фән министрлыгы, Халык мәгарифе һәм фән хезмәткәрләре профсоюзының республика комитеты тарафыннан уздырыла.

Исегезгә төшерәбез: 2014 елда конкурсны үткәргәндә беренче тапкыр Россиянең иң яхшы укытучысы исемен Татарстан данын яклап катнашкан Алла Головенькина яулады. Ул Нурлаттагы 1нче урта мәктәпнең биология укытучысы. Моңа кадәр Алла Головенькина республиканың “Ел укытучысы – 2014” бәйгесендә җиңеп чыккан иде. “Россия ел укытучысы” конкурсында каралганча, быелгы бәйге җиңүченең туган ягында, ягъни Казанда үткәреләчәк. Әлеге мәгълүматны ТР Мәгариф һәм фән министрлыгының матбугат хезмәте җиткерә.