ТР Юстиция министрлыгы коллегиясенең Илдар Халиков катнашында утырышы булды

Узган ел ТР Юстиция министрлыгы тарафыннан ТР Дәүләт Советына 92 закон проекты тәкъдим ителгән, шуларның 83е − планнан тыш булган закон проектлары. Шулай ук, ТР Министрлар Кабинетына 48 закон проекты тәкъдим ителгән, аларның 40ы муниципаль берәмлекләрнең чикләрен билгеләүгә кагылган.

Бу хакта бүген ТР Юстиция министрлыгының ТР Мәдәният министрлыгында узган коллегия утырышында юстиция министры Лариса Глухова хәбәр итте.

Утырыш, узган елга нәтиҗәләр чыгару һәм 2015 елга булган максатлар һәм бурычларга багышланган иде. Чарда ТР Премьер-министры Илдар Халиков, федераль һәм җәмәгать судьялары, прокуратура органнары, министрлык, муниципаль берәмлекләр җитәкчеләре, ТР Җәмәгать палатасы һәм ТР Юстиция министрлыгы каршындагы Иҗтимагый совет вәкилләре һ.б. катнашты.

Лариса Глухова 2014 нче елгы эшчәнлекнең төп күрсәткечләре буенча хисап тотты. Аның сүзләренчә, узган ел ТР Юстиция министрлыгы тарафыннан 1,2 меңнән артык проект һәм федераль закон буенча коррупциягә каршы экспертиза уздырылган. Экспертиза уздырылган проектларның 4,4 процентында, ягъни 56 очракта әлеге факторлар булу ачыкланган.

Лариса Глухова хокук бозучыларга салынган штрафларны түләтүгә кагылган мәгълүматларны да китерде. Муниципаль берәмлекләр тарафыннан дәүләт казнасына түләтергә тиешле штрафлар суммасы 53 миллион сумны тәшкил итә. Түләнмәгән штрафларның 41 миллионы Казан шәһәре, 2,9 миллионы Түбән Кама районы, 1 миллионы Алабуга районнары буенча булса, Бөгелмәгә 500 мең сум туры килә. ТР юстиция министры аңлатканча, бу хокук бозучылар белән эшчәнлек алып баруның түбән дәрәҗәдә булуын күрсәтә. Илдар Халиков исә әлеге мәсьәлә буенча эш нәтиҗәсеннән канәгать булмавын белдерде. “Аңлавымча, монда ирекле рәвештә штрафлар түләү буенча сүз бара. Штрафлар түләтү 50 проценттан да ким, ягъни күрсәткечләр 17-19 процент булуы мөмкин түгел! Бу мәсьәлә буенча муниципаль берәмлекләрдәге җитәкчеләр белән сөйләшүегезне һәм миңа аерым хат әзерләвегезне сорыйм”, - диде ТР Премьер-министры.

ТР юстиция министры хисабында башка министрлыклар белән эшчәнлеккә, законнарның электрон вариантта министрлык сайтына тест рәвешендә урнаштырылуы һәм гражданнар өчен ачык булуга, кадрлар мәсьәләсенә дә кагылды.

Аның беренче урынбасары Рөстәм Заһидуллин хәбәр иткәнчә, узган ел Татарстанда 250 кешегә дәүләт органнарында эшләүче адвокатлар түләүсез юридик ярдәм күрсәткән. Мондый адвокатларга, күп очракта, 1нче һәм 2 нче төркем инвалидлар, ятим балалар, Бөек Ватан сугышы ветераннары мөрәҗәгать итә икән. Алар хокук, алиметлар түләү, торак мәсьәләләренә кагылышлы сораулар буенча адвокатлардан ярдәм сорап килгән. Гражданнарга бушлай адвокат ярдәме күрсәтү максатыннан, дәүләт бюджетыннан 553 мең сум акча бүлеп бирелгән. Гражданнар, республиканың Спас районыннан кала, барлык районнарда түләүсез адвокат ярдәменнән файдаланган. Бу район кешеләре исә башка җирлектәге адвокатларга мөрәҗәгать итәргә хокуклы. Рөстәм Заһидуллин шулай ук, республикада түләүсез юридик ярдәмнән файдалануның популярлаша баруын да искәртеп үтте.

Утырышта катнашкан ТР Дәүләт Советының дәүләт корылышы һәм җирле үзидарә комитеты рәисе Альберт Хәбибуллин Татарстан парламенты һәм ТР Юстиция министрлыгы белән үзара эшчәнлек хакында чыгыш ясады.

Узган ел җәмәгать судьялары тарафыннан 450 меңнән артык эш каралган. Бу хакта ТР Югары суды рәисе Илгиз Газизов хәбәр итте һәм, аның сүзләренчә, бу − искиткеч зур сан.

“Узган елда бик зур эшләр башкарылды, аеруча да җәмәгать судьяларының эшен тәэмин итү, аларны җайлаштырылган биналарга урнаштыру буенча алга китеш зур. Җәмәгать судьяларының 15 участогы заман таләпләренә туры килә торган биналарга күчерелде, әмма Казан шәһәрендә бу өлкәдә башкарыласы эшләр әле бик күп”, - диде ул.

Илдар Халиков ТР Юстиция министрлыгы узган ел алдына куйган максатларны тулысынча үтәвен билгеләп үтте. “Законнар һәрдаим үзгәреп тора һәм бу − Юстиция министрлыгы өчен өстәмә эш. Әмма әлеге министрлык федераль дәрәҗәдә һәм республика күләмендә булган законнарны камилләштерү өстендә дә эшләргә тиеш. Хокукый актларның үз вакытында бастырылып чыгаруы мөһим, - дип ассызыклады Премьер-министр. – 2015 елда Бөек Ватан сугышы ветераннарына түләүсез юридик ярдәм күрсәтүгә аеруча зур игътибар бирергә кирәк . Моның өчен май яки февраль айларын гына көтеп ятарга түгел, әлеге эшне бүгеннән үк башларга кирәк”.

Утырыш азагында алдынгы хезмәткәрләргә дәүләт бүләкләре тапшырылды.