Гомумшәһәр планеркасында Социаль яклау идарәсенең эшенә йомгак ясалды

Бүген гомумшәһәр планеркасында Социаль яклау идарәсенең 2014 елдагы эшенә йомгак ясалды. Доклад белән идарә башлыгы хезмәтләрен башкаручы Кадрия Гыйматдинова чыкты.

Ел дәвамында Социаль яклау идарәсе аша райондагы 73 меңнән артык кеше төрле социаль түләүләр алган. Республика бюджеты исәбенә 41 мең кешегә айлык социаль яклау чаралары кулланылган.

Тулаем алганда, социаль яклау чараларына федераль бюджеттан, республика бюджетыннан һәм социаль иминият фонды бюджетыннан 643 миллион 883 мең сум акча тотылган.

Социаль яклау идарәсе халык төрле мәсьәләләр белән иң күп мөрәҗәгать итә торган структураларның берсе. 2014 елда анда үзләрен борчыган мәсьәләләр белән 80 115 граждан килгән. Аларның саны арту транспорт карталары алуга, шулай ук балаларны мәктәпкәчә учреждениеләргә йөрткән өчен өстәмә компенсация билгеләнүгә бәйле.

Докладының ахырында Кадрия Гыйматдинова идарәнең 2015 елга планнары һәм бурычлары турында сөйләде.