Көнбатыш санкцияләре “Татнефть” кә турыдан-туры йогынты ясамады – Наил Маганов

Әлмәттә «Татнефть” ААҖ генераль директоры Наил Маганов матбугат конференциясендә, 2014 ел “Татнефть” ААҖ өчен яхшы булды, дип белдерде. Аның сүзләренә караганда, Көнбатыш санкцияләре компаниягә турыдан-туры йогынты ясамады диярлек. “Без барлык юлларны карадык һәм бу куркыныч булыр дип санамыйбыз”, - дип белдерде ул.

“Нефть бәясе төшүгә килгәндә, беренче этапта бу “Татнефть” кә йогынты ясамады. Хәзер баррельгә 60, 40 доллар сценарие дә эшләнгән. Шул ук вакытта төп стратегик планнар үтеләчәк, бәлки нәрсәдер соңрак та башкарылыр”, - дип ачыклык кертте Наил Маганов.

Моның белән бәйле рәвештә, ул “ТАНЕКО” нефть эшкәртү заводының чираттагы корылмаларын вакытында эшләтеп җибәрүне атады, чөнки нефтькә караганда аның продуктларын сату нәтиҗәлерәк. Хәзердән үк “ТАНЕКО” илгә тулаем эчке продукт үсешен 21 млрд сумга арттырды, киләчәктә бу сан елга 71 млрд сумга кадәр артачак.

Киләчәктә компания еллык нефть чыгару күләмен 26,2 млн тоннадан ким булмаган дәрәҗәдә тотрыкландыруны планлаштырыла.