Әлмәттә көрәшчеләрне хөрмәтләү тантанасы булды

29 декабрьдә Әлмәт политехника техникумында ел батырларын хөрмәтләү, аларга бүләкләр тапшыру тантанасы булды.

2014 елда Әлмәт көрәшчеләре бик югары нәтиҗәләргә ирештеләр. Олылар командалары арасында бөтен кубокларга да алар хуҗа булды. Герой-шагыйрь Муса Җәлил исемендәге призга, ТР авыл хуҗалыгы министрлыгы призына республика турнирларында, ТР чемпионатында алар бик күп алтын медальләр яулап алдылар. Татарстан чемпионатыннан Әлмәт батырлары 6 алтын һәм 1 бронза медаль алып кайттылар.

Ә Уфа шәһәрендә үткән Россия чемпионатында безнекеләр 5 алтын медальгә ия булдылар. Әлбәттә, бу уңышларга ирешүдә шәһәр һәм район җитәкчелегенең, район башлыгы Мәҗит Салиховның, шулай ук “Татнефть” АҖ җитәкчелегенең булышлыгы зур роль уйнады.

Мәҗит Салихов көрәшчеләрне зур казанышлары белән котлады, батырларга һәм аларның тренерларына ӘМР советы һәм башкарма комитетының Мактау грамоталарын, рәхмәт хатларын тапшырды.

Әлмәт батырлары хөрмәтенә бәйрәм концерты оештырылган иде. Спортчыларны хөрмәтләү бәйрәм табынында дәвам итте.