Гадәти булмаган балалар өчен Яңа ел бәйрәме

25 декабрь көнне шәһәр паркының “Ассоль” кафесында аутист балалар өчен беренче тапкыр Яңа ел бәйрәме оештырылды. Аутизм – баланың үсеше тоткарлану сәбәпле, сөйләшү, үз-үзен карау, кайгырту күнекмәләренең булмавы буларак характерлана. Шуңа күрә дә аларга гадәти җәмгыятькә керү, кеше арасында яшәү бик авыр.

Кызганычка каршы, әлеге проблема безнең Әлмәт шәһәренә дә бар. Ике ел элек ата–аналар үзләре җыелып “Гадәти булмаган” балалар дип исемләнгән иҗтимагый оешма оештыралар. Әлмәттә әлеге диагноз белән 25 бала исәпләнә. Ошманың җитәкчесе Андрей Сатыбалов сүзләренә караганда, әлеге проблема башкарма комитет, мәгариф идарәсе югарылыгында хәл ителергә тиеш.

Кафеда уздырылган Яңа ел бәйрәменә килгәндә, ул балалар һәм аларның ата–аналары өчен чын мәгънәсендә көтелмәгән бүләк булды. Аларны мәгариф идарәсе, “Бердәм Россия” партиясенең Әлмәт бүлеге вәкилләре, 19 нчы коррекцион мәктәп директоры тәбрикләде. Балалар һәм яшүсмерләр үзәге хезмәткәрләре Яңа ел тамашасы күрсәтсә, “Бердәм Россия” партиясеннән баллы күчтәнәчләр, “КиндерМаг” һәм “Бегемотик” кибетләреннән бирелгән бүләкләр әлеге балаларның гадәти көнен бәйрәмгә әверелдерде.

Фәрдия Хәсәнова, “Альметьевский вестник” газетасы