Район башлыгы ветеранны котлады

Бүген Әлмәт районы башлыга Мәҗит Салихов Бөек Ватан сугышы ветераны Фаат Сафиуллинны 90 яше тулу белән котлады.

Фаат Фатих улы Әлмәт авылында туган. 1942 елда армиягә алынган. Фронтта пулемет ротасы командиры булган. Ике тапкыр яраланган, соңгы ярасын Курск дугасындагы бәрелештә алган.

1944 елда демобилизацияләнгән, туган ягына кайтып, Камы-Исмәгыйл мәктәбендә военрук булып эшли башлаган. Аннары район милиция бүлегенә участок инспекторы булып урнашкан. Бераздан Баулы районына тикшерүче итеп күчергәннәр, Чаллы эчке эшләр идарәсендә ике ел тикшерү бүлеге башлыгы булган.

1975 елда Фаат Сафиуллинны Әлмәт шәһәр эчке эшләр бүлегенең тикшерү бүлеге башлыгы итеп күчерәләр. Анда ул 1978 елга кадәр эшли. Эчке эшләр системасыннан ялга киткәннән соң хезмәт эшчәнлеген “Радиоприбор” заводында юрисконсульт булып дәвам итә.

Район башлыгы ветеранга чәчәкләр һәм бүләк тапшырды, ныклы сәламәтлек, озын гомер теләде. Ветеранны Әлмәт эчке эшләр бүлеге башлыгы полиция полковнигы Дамир Гарипов та тәбрикләде.

Ватан алдындагы хезмәтләре өчен Фаат Сафиуллин 1нче дәрәҗә Ватан сугышы, Кызыл Йолдыз орденнары, “Батырлык өчен” медале белән бүләкләнгән, юбилей бүләкләре күп.