Колониядәгеләр хезмәтеннән файдалану турында сөйләшү

Бүген башкарма комитетның зур залында 8нче төзәтү колониясенең җитештерү куәтләрен эшкә җигү турында киңәшмә-презентация булды. Аны район башкарма комитеты җитәкчесенең сәламәтлек саклау буенча урынбасары Равил Хәйруллин үткәрде. Киңәшмәгә колония белән хезмәттәшлек итү кызыксындырырдай предприятие җитәкчеләре һәм индивидуаль эшкуарлар чакырылган иде. Киңәшмә презентация характерында узды, чөнки колония үзе дә ябылудагылырның эшләве, файда китерүе белән кызыксына.

Бүгенге көндә 8нче төзәтү колониясендә 1200дән артык тоткын бар. Анда 27 гектар мәйданда 9 киптерү камерасы белән агач эшкәртү цехы, мебель җитештерү, пенобетон блоклар ясау цехы, пыяла пакетлар ясау участогы, автомобиль ремонтлау цехы бар. Эш киемнәре тегү цехы эшли. Күптән түгел генә “Алсу” оек-оекбаш фабрикасыннан оекбашлар җитештерү җиһазлары сатып алганнар. Колония Татарстан, Башкортостан республикаларының, Оренбург һәм башка күп кенә шәһәрләрнең зур компанияләре белән хезмәттәшлек итә. Әмма, кызганыч ки, бу эшләрдә ябылудагыларның аз өлеше генә катнаша.

Колниянең начальнигы Мәсгут Сабиров Әлмәт эшкуарлары, предприятиеләр һәм дәүләт учреждениеләре хезмәттәшлек итү белән кызыксынырлар дигән өмет белдерде, чөнки аның шартлары да файдалы, моның өчен законлы нигезләр дә бар.