Әлмәттә Иван Винокуров истәлегенә багышланган кичә узды

Узып баручы ел республикада иң олылардан саналган Әлмәт районы журналистлар оешмасы вәкилләре өчен аеруча истәлекле булды. “Акчарлак” ресторанының зур залында уздырылган бәйрәм кичәсе онытылмас вакыйгаларга җирлек бирде. Әлмәт журналистикасында якты эз калдырган, балалар шагыйре Иван Григорьевич Винокуровның истәлеген мәңгеләштерү максатыннан аның исемендәге премия бирү кабаттан торгызлды.

17 декабрь көнне бүгенге журналистиканың әйдәп баручы каләм ияләренә Иван Винокуров исемендәге махсус премия тапшыру тантанасы булды. Чарада Әлмәт муниципаль районы башлыгы Мәҗит Салихов, “Әлмәтнефть” идарәсе профсоюз комитеты рәисе Раиф Сафин, Иван Винокуровның кызы Лариса, журналистлар оешмасына кергән 70 тән артык иҗат әһелләре катнашты.

Әлмәт журналистлар оешмасы җитәкчесе Наилә Әл- Әйюби сүзләренә караганда, нефть тәбәгендә яшәп иҗат итүче журналистлар өчен премияне кабаттан торгызу турындагы тәкъдим “Әлмәтнефть” идарәсе җитәкчесе Миргазиян Таҗиев тарафыннан яклау таба. Бу, беренче чиратта, күп тиражлы “Нефтяник” газетасы редакторы Светлана Ежованың ярдәме белән мөмкин була. Танылган журналист, үткен каләм иясе Иван Винокуровның күп еллар нефтьчеләрнең хезмәтен яктыртуга багышлаган шәхес булуы да премиянең кабаттан булдырылуына бер этәргеч булгандыр.

Бәйрәм тантанасы район башлыгы Мәҗит Салиховның сәламләве белән башланып китте. Ул ил, җәмгыять тормышында журналистларның нинди мөһим роль уйнавын ассызыклап: “Сез власть һәм халык арасындагы күпер. Ул күперның никадәр нык һәм тотрыклы булуы күпчелек журналистларның позициясенә, активлыгына, фикер киңлегенә бәйле,” – диде. Журналистика ветераннарына тиешле игътибар һәм хөрмәт күрсәтелергә тиешлегенә басым ясады. Район башлыгының Әлмәт журналистлар оешмасы өчен “Нефтьче” мәдәният сараеның икенче катыннан махсус бүлмә бирелүе хакындагы хәбәрен каләм ияләре көчле алкышларга күмде. Кайда урын булса, шунда очрашып йөргән журналистлар өчен бу чыннан да сөенечле хәбәр, чын мәгънәсендә Яңа ел бүләге булды.

Чараның иң тантаналы өлеше, әлбәттә, 2014 елгы премия лауретлары белән танышу булды. Быел әлеге исемгә Луиза Подъячева, Фоат Гайсин, Сәрия Исхакова, Адель Газизуллина, Тимур Биктимеров лаек булды. Кызыксындыру премияләре Светлана Антонова һәм Анастасия Вакатовага бирелде.

Фәрдия Хәсәнова, “ Альметьевский вестник” газетасы