Ел башыннан Татарстанда эчке эшләр органнары тарафыннан 175 мең литр легаль булмаган алкоголь һәм спиртлы эчемлек әйләнештән алынган

Агымдагы елның 11 аенда Татарстан Республикасы эчке эшләр органнары алкоголь базары объектларында 30 мең 190 тикшерү үткәргән, шул исәптән якынча 14 мең автотранспорт тикшерелгән. Нәтиҗәдә, 11 ай эчендә 111 җинаять ачыкланган, 101 зат җинаять җаваплылыгына тартылган.

Бу хакта бүген ТР Хөкүмәте йортында узган брифингта Татарстан Республикасы буенча эчке эшләр министры урынбасары Рафаил Гыйльманов хәбәр итте. Аның әйтүенчә, ел башыннан Татарстанда 175 мең литр легаль булмаган алкоголь һәм спиртлы эчемлек әйләнештән алынган, шул исәптән 44 мең л Казакъстаннан, 51 мең л исерткеч Төньяк Осетиядән кертелгән.

Рафаил Гыйльманов Эчке эшләр министрлыгы тарафыннан легаль булмаган алкоголь белән сәүдә итүчеләрне фаш итү, мондый очракларны киметүгә җитди игътибар бирелүен ассызыклады. Быел бу эш тагын да җанландырылган. Ул хәбәр иткәнчә, оператив чаралар уздыру барышында, Казакъстан, Киров һәм Ульяновск өлкәләреннән законсыз төстә алкоголь кертү белән шөгыльләнгән 8 канал ябылган. Алкоголь продукциясен балигъ булмаганнарга сату очраклары буенча 16 җинаять эше кузгатылган. Алкоголь продукциясен җитештерү белән шөгыльләнгән өч законсыз производство ябылган, аларның икесендә эчемлекләр “Татспиртпром” товар билгесе астында җитештерелгән булган. Төньяк Осетиядән спиртлы эчемлекләр кертү белән мәшгуль булган өченче яшерен цех әле якын арада гына фаш ителгән һәм аның эшчәнлегенә чик куелган. Алар эчемлекне шешәләргә тутырып, “Белая береза” исеме астында кибет киштәләренә озаткан.

“Берьюлы 50 мең литр алкоголь продукциясе йолып алынды”, - дип хәбәр итте Рафаил Гыйльманов. Полиция башлыгы билгеләп үткәнчә, ел башыннан 2820 административ хокук бозу очрагы теркәлгән, аларның 270е өй шартларында ясалган алкогольне сату белән бәйле. Административ производстволар буенча салынган штрафларның гомуми суммасы 10 млн сумнан артып китә. Җинаять җаваплылыгына хөкем ителгән затларга килгәндә, Рафаил Гыйльманов сүзләренчә, аларның дүртесе генә реаль төстә ирегеннән мәхрүм булган. “Безнең максат - склад биналарының барысын да тикшереп чыгу, моннан тыш, декабрьдә юлларда да киңкүләм тикшерүләр уздырабыз. Шулай ук бар исеме астында продукция кибетләрендә бер почмакта сыйфатсыз аракы салып бирү очраклары да ачыкланды. Бу күренешләргә шулай ук чик куячакбыз, чөнки халык канәгатьсезлек, шикаятьләр белдерә”, - диде Р. Гыйльманов.