Әлмәтнең яшь спортчылары “Татарстан өметләре” чемпионатында осталыкларын күрсәттеләр

Спорт акробатикасы буенча “Татарстан өметләре” республика чемпионаты 4-7 декабрьдә Чаллыда үтте. Анда бөтен республикадан 312 спортчы катнашты.

Әлмәт командасында олимпия резервы махсус балалар-яшьләр спорт мәктәбеннән 17 бала бар иде. Киеренке көрәш нәтиҗәсендә алар берничә төр буенча лаеклы урыннар алды.

Тренерлар Екатерина Абдуллина һәм Инна Корнилова шәкертләре Мария Смолькина һәм Константин Асмандияров AGE-GROUP (11-16) катнаш парлы күнегүләрендә җиңеп чыктылар. Бу аларга 2015 елның маенда Идел буе федераль округы беренчелегендә Татарстан данын якларга мөмкинлек бирә.

Тренерлар Валентина Семакина һәм Земфира Семакина шәкертләре Валерия Зелинская һәм Самат Гарифуллин катнаш 1нче разрядлы парлы күнегүләрдә төп программада җиңделәр. Шул ук тренерлар тәрбияләгән Владислав Газизҗанов белән Шамил Хәмитов малайлар өчен 1нче разрядлы парлы күнегүләрдә 2нче урын яуладылар.