Әлмәт көрәшчеләре Уфадан ышанычлы җиңү белән кайттылар

Узган ял көннәрендә Башкортстан башкаласы Уфада татарча көрәш буенча Россия чемпионаты үтте. Әлеге бәйгедә беренче урынны ышанычлы рәвештә Татарстан командасы яулады. Безнекеләрне хәтта мәйдан хуҗалары да басып торып алкышлаган.

9 мөмкинлектән – 8 алтын. Татарча көрәш буенча Россия чемпионатында Татарстан көрәшчеләре әнә шундый искиткеч нәтиҗәгә иреште. Алтын медальләргә артык гаҗәпләнмәдек анысы, чөнки безнең республика милли спорт төребездә ил күләмендә берсүзсез фаворит икәнлеген барыбыз да белә. Ләкин шундый нәтиҗәгә төп көндәшләребез булган Башкортстан җирлегендә ирешү – чынлап та игътибарны җәлеп итә торган факт.

Хәтерләсәгез, узган ел Казанда оештырылган ил чемпионатында якташларыбыз бары ике үлчәүдә генә чемпион була алмаган иде. Ә Уфада бары бер авырлыкта гына уңыш елмаймады. Димәк, читтә безнекеләргә җиңү тагын да җиңелрәк бирелгән? Болай уйлаучылар бик нык ялгышыр. Әйе, Татарстан көрәшчеләре чемпионат узган бинада хәтта җирле тамашачыларны да алкышларга мәҗбүр иткән, әмма хакыйкый факт: җиңү беркайчан да җиңел бирелми. Спортта бигрәк тә.

Һәрвакыттагыча, бу юлы да Уфадан кайтуга ярышлар хакында Татарстанның татарча көрәш федерациясенең Башкарма директоры Равил Хәйруллин Intertat.ru хәбәрчесенә фикерләрен җиткерде.

Татарстан – Татарстан каршылыгы

60 кг.га кадәр авырлыкта Татарстан данын Рузил Ганиев яклады. Һәм ышанычлы рәвештә беренче урынны яулады. 19 көрәшче бил алышкан үлчәүнең финалында исә Рузил... тагын бер татарстанлы – Марат Купкенов белән көрәште. Билгеле булганча, Марат тумышы белән Чувашстанның Шыгырдан авылыннан. Бүгенге көндә ул Казанда белем ала, көрәшкә исә “Ак Барс” Көрәш Сараена йөри, республика ярышларында да шушы клуб данын яклый. Россия бәйгеләрендә үз туган ягы данын яклау мөмкинлеге тугач, ул, әлбәттә, мөмкинлекне кулдан ычкындырмый.

Ярымфиналда Купкеновка бигрәк тә авырга туры килә: Башкортстан егете белән көрәшә ул. Очрашу дәвамында 0:4 исәбе белән оттырып барганда, аның җиңүгә өмете калмаган булгандыр инде. Әмма Чувашстан – Татарстан егете үзендә ихтыяр көче табып, бер минут эчендә исәпне тигезли генә түгел, ә ахыр чиктә җиңүгә дә ирешә. Дөрес, финалда Рузил Ганиевның осталыгы да, тәҗрибәсе дә үзен сиздерә. Димәк, Рузилгә дә әле сөлгесен “кадак” элү турында уйларга иртәрәк.

Тыныч кына, ашыкмый гына...

65 кг.га кадәр исә Чаллы егете Рамил Хисмәтуллин җиңү яулый. Бу үлчәүдә 14 кеше катнашкан. Р.Хәйруллин фикеренчә, Рамил барлык көндәшләрен дә диярлек чистага салып, үзенең җиңүендә беркемгә дә шик калдырмаган.

Рамил өчен гомумән шатланырга кирәктер. Берзаман ул әллә билбаулы көрәшкә өстенлек бирә башладымы шунда, әллә һаваланып алдымы – уңыш аңа арты белән борыла башлаган иде. Быел авыл батырлары арасындагы бәйгедә дә, Татарстан чемпионатында да үзен игътибар белән күзәтеп тордым һәм Актанышта туып-үскән Чаллы егете тынычланган дигән нәтиҗәгә килдем. Авыл батырлары арасындагы ярышта хәтта җиңелүне дә бик тыныч кына кабул итте кебек ул. Нинди нәтиҗәләр ясагандыр үзе өчен – белмим, әмма Татарстан беренчелегендә дә, Россия чемпионатында да үзенең көчлерәк булуында чыннан да шик калдырмады.

70 килолылар арасында Әлмәт егете Рамил Синәкәевка тиңнәр табылмады. Финалда гына бераз авырга туры килгән аңа. Көндәше – мәйдан хуҗасы Артур Зөлкәрнәев, Рамил кебек үк, үсеп килүче талантлы егетләрнең берсе (Рамил 1993 елда туган, Артур – 1995 елда). Соңгы очрашуда Артур 2:0 исәбе белән алга чыга. Әмма Синәкәев каушамый да, борчылмый да, көтмәгәндә, көндәшен чистага китереп сала. “Бу алымны әйтеп аңлатып булмый, аны күрергә генә кирәк”, - ди бу уңайдан Р.Хәйруллин.

Тугызынчы алтын булмады

Ә менә 75 килолылар арасында көтелмәгән хәл була. Татарстан спортчысы Руслан Нургалиев Игорь Волобуевка оттыра. Күпләр бу авырлыкта финалда Руслан белән Башкортстан көрәшчесе Альберт Рәхмәтуллин очрашыр дип фаразлый. Асылда, алай килеп чыкмаган. Альберт икенче әйләнештә җәрәхәт ала һәм хастаханәгә озатыла. Финалда исә Чиләбе көрәшчесе Дим Хәйруллин (әлеге көрәшченең Татарстандагы аерым ярышларга үз хисабына килгәләүче Башкортстан егетен күпләр хәтерлидер дә) шул ук Волобуевны бирелдерә. Шул рәвешле, әле күптән түгел генә бер ел дәвамында көрәшмәгән, берничә операция кичергән Р.Нургалиевка тугызынчы тапкыр Россия чемпионы булып танылырга насыйп булмады.

80 килолылар арасында “Ак Барс” Көрәш Сарае вәкиле Илмир Төхвәтуллин җиңү яулады. Узган ел Илмир өченче урында гына калган иде. Хәзер инде осталык та арткан, тәҗрибәсе дә арта. Ярымфиналда ул былтыр 85ләр арасында чемпион калган Илдар Муратовны бирелдерә. Афәрин!

Ә 85 кг.га кадәр үлчәүдә исә быел Марсель Гозәеровка бәхет елмая. Финалда аңа моңарчы Татарстан көрәшчеләрен шактый җиңүгә ирешкән, узган ел Казанда чемпион калган Наил Мөхәмәтҗановның үзен 3:1 исәбе белән җиңә. Шул рәвешле, Нурлатта туып-үскән Әлмәт командасы вәкиле Марсель быел барлык титуллы ярышларда да (Муса Җәлил истәлегенә узучы турнир, Татарстан чемпионаты, Россия чемпионаты) җиңүгә ирешә.

Авырлар

Алдагы өч авырлыкта чыгыш ясаган һәм җиңү яулаган Татарстан көрәшчеләре турында Равил Гарифулла улы бер генә сүз – “Молодецлар!” дигән бәя бирде. 90 килолылар арасында Түбән Камадан Радик Сәләхов алтын медаль ала (финалда Башкортстаннан Айгиз Зәйнетдиновны 4:1 исәбе белән ота). 100ләр арасында Айвар Билаловның җиңүен белгечләр алдан ук фаразлап куйган була: финалда ул тагын бер татарстанлы, биредә шулай ук туган төбәге – Мари Иле өчен көрәшкән Муса Галләмовны бирелдерә.

Ә менә “дәүләр” арасында Ильяс Галимов бары финалда гына чиста җиңү яуламый. Моңарчы барлык көндәшләрен чистага салган Әлмәт вәкиле (Татарстан командасының капитаны) соңгы алышта Сергей Павликны 4:1 исәбе белән җиңә. Һәм бөтен тамашачылар, аягына басып, аңа кул чаба. Хәтерләсәгез, 2013 елда Казанда узган финалда да Ильяс Ульян көрәшчесен җиңеп, ул чакта Казан тамашачылары алкышларына лаек булган иде. Афәрин!

...Равил Хәйруллин көрәшчеләргә дә, Татарстан командасының тренерлары Ильяс Билалов белән Булат Хәбибрахмановка да, хөкемдарлар Әүхәт Мөхәммәдиев белән Ленар Биктимеровка да рәхмәтләрен җиткерде. Шунысы да бар, Россия чемпионатына алты көрәшче белән барган Әлмәт командасы өчен җан атарга район башлыгы Мәҗит Салихов та килгән. Intertat.ru да Россия чемпионатына ышанычлы җиңү яулаган Татарстан командасын тәбрик итә.

60 кг.:
1) Рузил Ганиев (Татарстан),
2) Марат Купкенов (Чувашстан),
3) Ильфак Ибатуллин (Башкортстан), Артем Фазгиев (Пермь).

65 кг.:
1) Рамил Хисмәтуллин (Татарстан),
2) Артур Шәрәфетдинов (Оренбург),
3) Рамил Галимов (Башкортстан), Илшат Әгълиуллин (Ульян).

70 кг.:
1) Рамил Синәкәев (Татарстан),
2) Артур Зөлкәрнәев (Башкортстан),
3) Марсель Сафиянов (Чувашстан), Ренат Гасанов (Әстерхан).

75 кг.:
1) Дим Хәйруллин (Чиләбе),
2) Игорь Волобуев (ХМАО),
3) Марат Әхмәтшин (Оренбург), Мөнир Галләмов (Мари Иле).

80 кг.:
1) Илмир Төхвәтуллин (Татарстан),
2) Алмаз Мостафин (Ульян),
3) Нурлан Фаталиев (ХМАО), Али Асадов (Әстерхан).

85 кг.:
1) Марсель Гозәеров (Татарстан),
2) Наил Мөхәмматҗаннов (Башкортстан),
3) Ерванд Егоян (ХМАО), Руслан Сәхбиев (Ульян).

90 кг.:
1) Радик Сәләхов (Татарстан),
2) Айгиз Зәйнетдинов (Башкортстан),
3) Денис Сетнеров (Ульян), Роман Глотов (ЯНАО).

100 кг.:
1) Айвар Билалов (Татарстан),
2) Муса Галләмов (Мари Иле),
3) Расүл Мөхәммәтов (Чиләбе), Ринат Сәләхутдинов (Киров өлкәсе).

Авыр үлчәү:
1) Ильяс Галимов (Татарстан),
2) Сергей Павлик (Ульян),
3) Рөстәм Арсланов (Башкортстан), Таһир Хуҗагалиев (Удмуртия).

Закир МӘХМҮТОВ, Intertat.ru