Быел 11 айда Татарстанда торак төзү буенча еллык бурычның 86 проценттан артыгы үтәлгән

Кичә торак һәм социаль объектларны (мәктәпкәчә балалар учреждениеләрен, фельдшерлык-акушерлык пунктларын, амбулаторияләрне, сырхауханәләрне, клубларны, спорт мәйданчыкларын) төзү буенча республика программаларын гамәлгә ашыру мәсьәләсе буенча муниципалитетлар белән бергә видеоконференция режимында республика киңәшмәсе уздырылды.

Татарстанда 2014 елның 5 декабренә алынган күрсәткечләр буенча, 2 млн. 78,3 мең кв. м. торак файдалануга тапшырылган, ягъни еллык бурычның 86,6 проценты үтәлгән. Бүген бу хакта ТР Хөкүмәте йортында уздырылган киңәшмәдә республиканың төзелеш, архитектура һәм ТКХ министры Ирек Фәйзуллин хәбәр итте.

Әлеге киңәшмәне Татарстан Республикасы Президенты Рөстәм Миңнеханов алып барды. Киңәшмә эшендә шулай ук ТР Премьер-министры Илдар Халиков та катнашты.

Ирек Фәйзуллин хәбәр иткәнчә, республикада хезмәтне саклау өлкәсендә эш дәвам итә. Контроль-күзәтчелек органнары төзелә торган объектларда атна саен хезмәтне саклау таләпләре үтәлешен тикшереп торалар. Дәүләт төзелеш күзәтчелеге инспекциясе 2014 елда 931 тикшерү уздырган. Хезмәтне саклау кагыйдәләрен һәм нормаларын бозуларга карата 19 млн. 268 мең сумлык штраф салу турында 508 карар чыгарган. Бүгенгә республика буенча 11 млн. 416 мең сум штраф түләттерелгән.

«Татарстан Республикасы төзүчеләре бердәмлеге» оешмасы 1031 төзелеш оешмасында тикшерү уздырган. Ел башыннан хезмәтне саклау хокукларын бозу очраклары булган 830 оешмага карата дисциплинар җаваплылык билгеләнгән, 626 таныклыкның гамәлдә булуы туктатылган.

Социаль ипотека программасы буенча 2014 елның 5 декабренә күрсәткечләр буенча гомуми мәйданы 264,8 мең кв. метр мәйданда 4 мең 520 фатирлы 99 йорт тапшырылган. Тагын 29 объектта эшләр төгәлләнү алдында. Ятим, ата-ана кайгыртуыннан мәхрүм балаларны торак белән тәэмин итү кысаларында республиканың 19 муниципаль берәмлегендә 1әр бүлмәле 309 фатир алу планлаштырыла. 2014 елның 5 декабренә 211 торак бинага милек хокукы рәсмиләштерелгән, шулардан 182сендә ятим балалар белән найм килешүе төзелгән, 98 торак бина буенча документлар рәсмиләштерелә. Барлык торак урыннар да файдалануга тапшырылган.

ТР мәгариф һәм фән министры Энгель Фәттахов, республика Премьер-министры сорауларына җавап биреп хәбәр иткәнчә, ел азагына кадәр барлык торак урыннар да рәсмиләштерелеп, ятим балаларга тапшырылачак.

5 һәм аннан да күбрәк балалы гаиләләрне торак белән тәэмин итү программасы буенча ел башыннан бирле 122 млн. сумлык 37 сертификат бирелгән. 2014 елның 5 декабренә шулардан 37 сертификат та тормышка ашырылган, дип хәбәр итте Ирек Фәйзуллин.

Ул искә төшереп узганча, 2015 елда Татарстан Республикасы бюджетында 5 һәм аннан да күбрәк балалы гаиләләрне торак белән тәэмин итү программасы буенча 128 млн. 101 мең сум акча каралган.

Торак белән тәэмин итү исемлегенә республика буенча күп балалы 824 гаилә кертелгән. Күп фатирлы инвестицион торак программасы буенча бүгенгә 45 торак йорт тапшырылган, 39 йорт төзелеп беткән диярлек (төзелеш башкарылышы 70 проценттан артык); 2 йорт -уртача әзерлектә (30 дан 70 процентка кадәр); 4 йортта - әзерлек дәрәҗәсе түбән.

2014 елга балалар бакчаларын төзү программасы буенча төзелеш-монтаж эшләре барлык объектларда да тәмамланган. 4 объектта җитешсезлекләрне бетерү эшләре бара, шул исәптән Казан шәһәренең Чапаев-Максимов урамнары чатында урнашкан объект (220 урынга исәпләнгән) һәм Кадыш бистәсендә (80 урынлык), Алабугада (260 урынлык), Чистайда (220 урынлык).

ТР Премьер-министры Илдар Халиков муниципаль берәмлекләр башлыкларын объектлар буенча тиешле документларны билгеләнгән срокларда тапшырырга өндәде.

Киңәшмә барышында Ирек Фәйзуллин шулай ук төзелеш өлкәсендәге 2015 елда гамәлгә ашырылачак программалар турында сөйләде.

Социаль ипотека программасы үтәлеше турында ТР Президенты каршындагы Дәүләт торак фонды башкарма директоры Тәлгать Абдуллин чыгыш ясады.

Автомобиль юллары салу һәм реконструкцияләү программасын гамәлгә ашыру буенча ТР транспорт һәм юл хуҗалыгы министры Ленар Сафин хисап тотты.