Фәрит Мөхәммәтшин: “Әлмәт театрының үткәне- данлы, бүгенгесе -мактаулы, киләчәге – ышанычлы”

Әлмәт татар дәүләт драма театрының 1944 елдан башланган үзенчәлекле тарихы бар. Мәдәният елында әлеге сәнгать учагы оешуга нәкъ менә 70 ел тулу аның иҗтимагый һәм сәяси әһәмиятен тагын да арттыра. Театрның юбилей кысаларындагы чаралары ел дәвамында Әлмәт кенә түгел, Татарстан, Рәсәй тамашачыларына да бик күп онытылмас мизгелләр бүләк итте. 5 декабрь көнне Әлмәт татар дәүләт театры тантаналы шартларында үзенең 70 еллык күркәм юбилеен билгеләп узды. Бәйрәм чараларында Татарстан Республикасы Дәүләт Советы рәисе Фәрит Мөхәммәтшин, ТР Мәдәният министры Айрат Сибагатуллин, Әлмәт муниципаль районы башлыгы Мәҗит Салихов, “Татнефть” ААҖ генераль директоры урынбасары, Дәүләт Советы депутаты Рөстәм Мөмәммәдиев, Рәсәй, республиканың бик күп театрларыннан, күрше муниципаль районнардан вәкилләр, театр ветераннары, тәнкыйтьчеләр һәм тамашачылар катнашты.

Театр коллективын халыкка таныткан “Кайту”,” Туган –тумача” һәм башка берничә спектальдән куелган өзекләр тамашачыларны 7 дистә ел артка алып китте. Үз заманында күпләрнең кумиры булган Дамира Кузаева, Зәкия Туишева һәм башка күренекле артистлар башкарган рольләр видеотасмаларда иң кадерле истәлек булып саклана.

Бүгенге бәйрәмгә мин аеруча дулкынланып килдем. Чөнки Әлмәт театры миңа якын һәм кадерле. Үзем биредә эшләгән вакытларда аларның ничек эшләүләрен, яшәүләрен күрә , белә, бергәләп кайнаша идек. Әле менә бүген спектальдән күренешләр карадык. Илдә сугыш барган, ач-ялангач мәлдә әлмәтлеләр киләчәккә карап, аның халкыбызга хезмәт итәренә инанганга күрә театр оештырганнар һәм ялгышмаганнар. Инде менә 70 елдан артык Әлмәт театры милли кыйммәтләребзне, әдәбиятны һәм сәнгатьне саклауга , үстерүгә үзеннән лаеклы өлеш кертә, фидакарь хезмәтләренә бирелгән бәяләре дә искиткеч зур. Әлмәт театрның үткәне - данлы, бүгенгесе-мактаулы, киләчәге – ышанычлы,- дип ассызыклады Фәрит Мөхәммәтшин үзенең тәбрикләү сүзендә. Дәүләт Советы рәисе Президентыбыз Рөстәм Миннеханов, республика җикәкчелеге исеменнән Әлмәт татар дәүләт театры коллективын 70 еллык юбилее белән тәбрик итеп хөкүмәтебезнең Рәхмәт хатын тапшырды. Тамашачыларның яраткан артистлары Асия Харисова, Гөлнара Вәлиевага Татарстанның атказанган артисты дигән мактаулы исемнәр бирелде.

Мәдәният министры коллективның эшчәнлегенә югары бәя биреп Россия театр эшлеклеләре Союзы рәисе Александр Колягин кулы белән имзаланган Рәхмәт хатын тапшырды . “Мин бирегә килеп керү белән кеше йөрәгенең җылысын тоям. Йөрәктән чыккан гына йөрәккә барып җитә. Киләчәктә дә тамашачыларны рухландырып, бергә тупланып эшләргә, яңадан-яңа үрләргә күтәрелергә насыйп итсен, “ – диде ул.

Район башлыгы Мәҗит Салихов барлык әлмәтлеләр исеменнән коллективка ихластан тәбрикләү сүзләрен җиткерде.

-Нефтьчеләр башкаласы үзеннән аз гына олырак булган шушындый театры булу белән чиксез горурлана. Төбәк, республика тарихында тирән эз калдырган әлеге сәнгать учагы бүген дә әлмәтлеләрне яңа эшләргә рухландыра, күңелләребезне сафландыра, -дип басым ясады район башлыгы. Коллектика Рәхмәт хаты һәм 100 мең сумлык сертификат тапшырды.

“Татнефть” ААҖ нең Әлмәт татар дәүләт драма театрына булган кайгыртучан мөнәсәбәте һәрберебезнең күз алдында. Нефтьчеләребез кайнар котлау сүзләре белән ихлас ихтирамнарын белдергәннән соң коллективның хезмәт хакы фондына 1,5 миллион сум һәм сәхнә костюмнары тектерү өчен 500 мең сум бирүләрен әйттеләр.

70 ел дәвамында театр репетуарының алтын фондын тәшкил иткән спектакльләрдән куелган өзекләр белән аралашып барган юбилей кичәсендә республикабызның Камал, Тинчурин, Качалов һәм башка театры вәкилләре генә түгел, Башкортстан , Калмыкия, Дагыстан республикалары , Йошкар- Ола шәһәрләреннән дә кунаклар катнашты һәм чыгыш ясады.

Фәрдия Хәсәнова, “Альметьевский вестник”газетасы